Almaty.tv jazǵandaı, Qaraǵandy oblysynyń Shet aýdanyna qarasty Taldy tarıhı-arheologııalyq parkinde jaz bastalǵaly jumys qyzý. Qazir mundaǵy qola dáýirine jatatyn Taldy men Aqkezeń qorymy muqııat zerttelip jatyr. Baǵzy zaman adamdarynyń turaqtaryn qazý kezinde solardyń birinen saq dáýirine jatatyn temir qanjar tabyldy. Arheologtar «shirimeı, pishini de sol kúıi saqtalǵan qarýdyń ıesi de osy jerde jerlenýi múmkin» deıdi.
– Saq dáýirindegi «akınak» deıdi. Temir sol kúıi saqtalǵan. Adam jerlengen jerine áli túsken joq. Qazba jumystary jasalyp jatyr. Tabylǵan qanjar ólketaný mýzeıine tabystalady. Ol týrısterge, qala turǵyndaryna kórsetiledi, – dedi Eskertkishterdi qorǵaý ortalyǵy dırektorynyń orynbasary Janbolat Májıtov
Saqtardyń qarýy sanalǵan aqınaqtan bólek, qazba jumysy kezinde qysh qumyra men ózge de áshekeıler tabylǵan. Al qypshaq dáýirine jatatyn qorymnan tórt túliktiń súıegi kóp shyǵypty.
– Qypshaq dáýirine jatatyn taspen qorshalǵan aýmaqty qazyp jatyrmyz. Qorymdardyń salyný ereksheligi qypshaq kezeńiniń dástúr-tanymyna saı keledi. Mal sharýashylyǵymen aınalysqan. Usaq mal, jylqy súıegi kóp tabylyp jatyr, – dedi «Saryarqa» arheologııalyq ınstıtýtynyń dırektory Alekseı Kýkýshkın.
Taldy kesheninen tarıhı jádigerdiń tabylýy birinshi ret emes. 2016 jyly arheologtar anyqtaǵan satyly «Saryarqa pıramıdasy» talaı jańalyqtyń ashylýyna sep bolǵan. Keıinnen zertteý nátıjesinde ekspedısııa músheleri bul aýmaqtan Beǵazy-Dándibaı mádenıetine jatatyn qala ornyn, qos at pen qysh ydystar qosa kómilgen kóne qorymdy anyqtaǵan. Atalǵan tarıhı qorymdar búginde qalypqa keltirilip, týrıster keletin orynǵa aınalǵan.
