Sákentanýǵa bar ǵumyryn arnaǵan belgili ǵalym Tursynbek Kákishuly: «Sákenniń sáni – búkil qazaqqa tanylǵan seriliktiń, syrbazdyqtyń, kerbezdiktiń jaqsy úlgisi bolatyn», degen edi. Ǵalymnyń osy bir aýyz sózi aıtýly tulǵanyń bekzat bolmysyn tolyq ashyp tur. Aqynnyń jaqyndary óz estelikterinde Sáken osy shapan pen taqııany úıde jeke shyǵarmashylyqpen aınalysqanda kıip otyrǵanyn jazady. Sondaı-aq syrshyl sýretkerdiń Máskeýde keńes jazýshylarynyń I cezinde delegattardyń arasynda osy taqııany kıip túsken sýreti de bar. Bul beıne 1964 jyly ol týraly túsirilgen derekti fılmde kórsetiledi. О́zbek sheberleri shapandy jolaǵy bar taza matadan tikken. Jolaqtar jasyl, sur jáne qoıý kók tústen turady. Al taqııa túrli-tústi jibek jipten tigilgen. Qaıratkerdiń zaıyby Gúlbahram Sáken aqtalǵanǵa deıin eriniń tutynǵan zattaryn kóziniń qarashyǵyndaı saqtapty. Bir jaǵynan, bolashaqta aqynǵa mýzeı ashylsa, soǵan tapsyrmaq oıy da bolǵan. Biraq adamnyń oılaǵany bola bere me? 1973 jyly Gúlbahram dúnıeden ozǵannan keıin ardaqty azamattyń zattary Almatydaǵy mýzeıge ótkizilgen. 1988 jyly birtýar tulǵanyń izi qalǵan burynǵy Aqmola, qazirgi Astanada Sáken Seıfýllın mýzeıi ashylyp, osy murajaıǵa sol jádigerlerdiń birazy tapsyryldy. Bıyl Sáken atamyzǵa ózbek dostary syılaǵan shapan men taqııaǵa 90 jyl tolady. Búginde aqyn ómirinen bir úzik syr shertip turǵan qundy jádiger atalǵan mýzeıdiń tórinde tur.
