Foto: MQIA baspasóz qyzmeti
Memlekettik qyzmet salasyndaǵy HR-dyń strategııalyq zamanaýı tájirıbeleri týraly pikirtalas jáne aqparat almasýǵa arnalǵan semınarǵa Ázerbaıjan, Grýzııa, Qyrǵyzstan, Tájikstan, Túrkııa jáne О́zbekstan, Bosnııa jáne Gersegovına, Soltústik Makedonııa elderiniń memlekettik qyzmet salasyndaǵy ýákiletti organdar men Astana memlekettik qyzmet habynyń basshylary, sondaı-aq sheteldik salalyq sarapshylar qatysty.
Darhan Jazyqbaı sheteldik áriptesterine Qazaqstanda memlekettik qyzmetti transformasııalaý baǵytynda «adamǵa baǵdarlanǵan», servıstik sıpattaǵy memlekettik apparatty qalyptastyrý sharalary jaıly baıandady.
«Memleket basshysy Qasym-Jomart Kemelulynyń Ádiletti Qazaqstan qurý jónindegi reformasy – elimizdiń árbir azamaty úshin teń múmkindikterdi qamtamasyz etýdegi basty baǵdar. Osyǵan oraı, biz mansaptyq jáne pozısııalyq modelderdiń elementterin qoldana otyryp, memlekettik qyzmettiń gıbrıdti modelin qalyptastyrýdamyz», dedi MQIA tóraǵasy.
Ol jańa gıbrıdtik model aıasynda memlekettik qyzmetke «kirý» jáne odan «shyǵý» talaptarynyń jeńildetilýi, HR quraldaryn keńinen qoldaný jáne adamı resýrstardy strategııalyq basqarý júıesin damytý, kásibı mamandar men daryndy jastardy tartý, «e-Qyzmet» júıesinde iske qosylǵan onlaın irikteý formaty men personaldy basqarýdy sıfrlandyrý boıynsha Agenttikpen júzege asyrylyp jatqan jobalar men bastamalarǵa toqtaldy.
Sondaı-aq elimizdegi memlekettik qyzmetshilerdi baǵalaýdyń jańa avtomattandyrylǵan júıesine nazar aýdaryldy. Búginde memlekettik qyzmettegi basshylar úshin baǵalaý KPI-ge qol jetkizý nátıjeleri negizinde, qatardaǵy qyzmetshiler úshin – mindetterdi oryndaý sapasyna, merzimderdi saqtaýǵa, derbestik pen bastamashylyqqa, eńbek tártibine negizdelgen saralaý ádisi boıynsha júzege asyrylady.
Semınarǵa qatysýshy elder memlekettik qyzmettegi irikteý jáne quzyretterdi baǵalaý boıynsha ozyq tájirıbelerdi talqylap, memlekettik apparattyń tıimdiligin arttyrýda zamanaýı HR quraldaryn qoldanýdyń mańyzdylyǵyna toqtaldy.
Aıta keterligi, qatysýshylar memlekettik qyzmetti damytý boıynsha Qazaqstannyń tájirıbesine erekshe qyzyǵýshylyq tanytty. Máselen, Bosnııa jáne Gersegovına memleketiniń ókilderi «e-Qyzmet» júıesi boıynsha tájirıbe almasýǵa múddeli ekendikterin jetkizdi. Al Ázerbaıjan respýblıkasynyń sıfrlyq damý jáne kólik mınıstrligi Qazaqstandaǵy Assesment ortalyqtyń tájirıbesin óz baǵalaý júıesin ázirleýde eskergenin aıtty.
Shara aıasynda MQIA tóraǵasy Darhan Jazyqbaı Ázerbaıjandaǵy memlekettik qyzmetke kadrlardy irikteýdi júzege asyratyn Memlekettik emtıhan ortalyǵy jáne jańa sıfrlyq tehnologııalardy paıdalana otyryp, memlekettik qyzmetshiler men azamattar arasyndaǵy ózara is-qımyldy qamtamasyz etýge baǵyttalǵan ASAN memlekettik qyzmet kórsetý ortalyǵynyń jumysymen tanysty.
