Foto: stan.kz
Astana qalasy Esil aýdandyq polısııa bóliminiń krımınalısi Rınat Muqyshev Iphone markaly telefon joǵalsa qandaı jaǵdaıda qylmystyq is qozǵalatynyn aıtyp berdi.
«Iphone-dy kezdeısoq taýyp alǵan adam satyp jiberse, ol qylmysqa jatpaıdy. Eger qaltańyzǵa, sómkeńizge arnaıy qol suǵyp urlaǵan jaǵdaıda qylmystyq quram bary belgili. Mundaı jaǵdaıda telefon ıesi qanshalyqty tez quzyrly organǵa shaǵymdansa, soǵurlym múlikti tabý jeńilirek bolady. Osyndaı mazmundaǵy qońyraý tússe boljaldy urlanǵan, joǵalǵan orynǵa alǵash bolyp krımınalıster attanady. Olar sol mańdaǵy beınebaqylaý kameralaryn qarap, tekserip, aıǵaq zattardy tabýǵa da kúsh salady. Joǵalǵan telefon dereý qylmystyq esepke qoıylyp, tehnıkalyq derekteri jazylady. Sol arqyly Iphone-nyń qaı núktede sóndirilgenin, qandaı mekenjaıda qosylǵanyn anyqtaý múmkindigi týady. Urlyq faktisi kamera arqyly anyqtalsa, kúmándi adamnyń foto-roboty Obraz 3.0 qurylǵysyna salynyp, VIZIR apparaty arqyly aıqyndalady. Qolda bar derekter jedel ýákilge joldanyp, ary qaraıǵy isti sol maman júrgizedi», dedi krımınalıst Rınat Muqyshev.
Mamandar telefon ıelerin túrli áreketke aldyn ala daıyndalyp, qaýipsizdik sharasyn saqtaýǵa keńes beredi. Bul qatarda telefonnyń bastapqy betine kúrdeli qupııa sóz ornatý, derekter jazylǵan qorapty saqtaý, IMEI kodty bilý syndy máseleler bar.
«Joǵaryda atap ótkenimdeı biz azamattardyń telefon joǵaltý, urlatýyna qatysty barlyq derekti qylmystyq esepke qoıamyz. Bul telefondy izdeý polısııa tarapynan toqtatylmaıtynyn ańǵartady. Eger 1 jyl buryn joǵalǵan smartfon qosylǵan jaǵdaıda bizge dereý sıgnal túsedi. Ary qaraı oryndy anyqtaý sharasy qabyldanady. Azamattarǵa aıtarym, al eger telefondy tapqan, qoldy qylǵan adam ony bólshektep «jóndeý jumystary úshin» satyp jiberse tabý prosesi de qıyndaıdy», dep túsindirdi krımınalıst.
Al Apple shyǵarǵan smartfondardy ishki baptaýlaryna qaraı tabý prosesine kelsek, «iPhone markasynda tabý» fýnksııasy bar. Ony aldyn ala qosý kerek. Qosylyp turmaǵan jaǵdaıda, iSloud-ta avtorızasııa jasap, https://icloud.com/find saıtyna ótý kerek. Júıege Apple ID-men kiredi. Sonyń ishinde «telefon joǵaldy» dep belgilegennen keıin smartfon buǵattalady, Apple Pay arqyly tólem jasalatyn qosymshalar da avtomatty túrde óshedi. Eger «iPhone-dy tabý» fýnksııasy óship tursa, jeke málimetterdi qorǵaý úshin shuǵyl Apple ID qupııasózin ózgertý kerek.
