F tobyndaǵy 3-týr oıyndarynda sensasııalyq nátıje tirkeldi. Aıdy aspanǵa shyǵarǵan Grýzııa quramasy azýy alty qarys, álemniń úzdik oıynshysy, ańyz fýtbolshy Krıshtıaný Ronaldý bastap shyqqan Portýgalııa ulttyq quramasyn 2:0 esebimen eseńgirete utyp, pleı-off kezeńine joldama aldy.
Jaýyrynǵa qarap sáýegeılik tanytqandar bul topta Grýzııa quramasyn aýtsaıder sanap, kúni buryn saptan shyǵaryp ta tastaǵan edi. Túrkııa quramasynan 3:1 esebimen utylǵanda, Chehııa fýtbolshylarymen 1:1 oınap, 1 upaı oljalaǵanda da grýzınder toptan shyǵady degenge asa senim ornaı qoıǵan joq. Dese de osy eldiń ulttyq quramasynyń bas bapkeri laýazymyna 2021 jyly taǵaıyndalǵan fransýz mamany Vıllı Sanoldiń eńbegi maqtaýǵa turarlyq-aq. Tegeýrindi quramanyń qaharynan yqpaı, kerisinshe jalyn jyǵýdyń jolyn kórsetti. 2-mınýtta Hvıcha Kvarashelııa Eýropa chempıonatynyń fınaldyq kezeńindegi alǵashqy golyn soǵyp, quramasyn alǵa shyǵardy. 57-mınýtta penaltıden esepti eseleı túsken Jorj Mıkaýtadze enshisine úshinshi golyn jazyp, osy qurlyq dodasynda mergender kóshin bastady.
Portýgalııa quramasynyń kapıtany Krıshtıaný Ronaldý buǵan deıin Eýropa chempıonatynyń fınaldyq oıyndaryna 5 márte qatysyp, barlyq dodanyń toptyq kezeńinde gol soqqan bolatyn. Al bıylǵy alamanda saqa oıynshynyń shaý tarta bastaǵany aıqyn baıqaldy. Ronaldý toptyq kezeńdegi úsh matchta da gol toǵyta almady. Bul toptaǵy sońǵy oıyndy ótkizgen Chehııa quramasy Túrkııa fýtbolshylaryna 1:2 esebimen ese jiberdi.
E tobynyń toptyq kezeńdegi oıyndarynan keıingi túzilgen statıstıkasy qyzyq. 3 týr oıyndarynda teń nátıje tirkeldi. Ýkraına men Belgııa quramasy arasyndaǵy matchta esep ashylǵan joq. Al Slovakııa men Rýmynııa quramalary arasyndaǵy tartysta 1:1 esebi tirkeldi. Dýda 24-mınýtta esep ashqanymen, 37-mınýtta Marın penaltıden tarazy basyn teńestirdi. Toptyq kezeńdegi úsh matchtan keıin tórt qurama da 4 upaıdan jınady. Tek gol aıyrmasynyń arqasynda Rýmynııa, Belgııa, Slovakııa quramalary pleı-off kezeńine ótti.
Endi 6 toptan úzdik shyqqan 16 qurama 8/1 fınaldyq tartysyn bastaıdy. Erteń Shveısarııa quramasy 2021 jyly ótken Eýropa chempıonatynyń jeńimpazy Italııa quramasyna qarsy oınaıdy. Tórt jyl buryn Shveısarııa men Italııa quramalary bir topqa túsip, pleı-offqa ótti. Tipti 8/1 fınalda Shveısarııa quramasy azýly Fransııa fýtbolshylarymen 90 mınýt boıy teń oınap (esep 3:3) penaltı serııasynda jeńisti julyp alǵan bolatyn. Alaıda shırek fınalda Ispanııa quramasymen negizgi ýaqytta 1:1 nátıjesimen tartysyp, penaltıden 1:3 esebimen jol bergen bolatyn. Bıyl sol bıiginen asý úshin aldymen Italııa fýtbolshylaryn toqtatýǵa tıis. Buǵan deıin qos qurama ózara 16 márte joly túıisip, 8 ret Italııa fýtbolshylary jeńse, shveısarııalyqtardyń 3 matchta mereıi ústem túsken. 8 oıynda teń nátıje tirkeldi.
30 maýsymda Germanııa Danııa quramasyn qabyldaıdy. 1992 jyly Shvesııada ótken Eýropa chempıonatynyń fınalyna osy eki qurama shyǵyp, dat fýtbolshylary 2:0 esebimen jeńgen bolatyn. Odan keıin 2012 jyl ótken qurlyq dodasynda qos qurama V tobyna tústi.
Pleı-off kezeńiniń qalǵan oıyndary mynadaı:
Ispanııa (1V) — Grýzııa (3F)
Germanııa (1A) — Danııa (2S)
Portýgalııa (1F) — Slovenııa (3C)
Fransııa (2D) — Belgııa (2E)
Rýmynııa (1E) — Nıderlandy (3D)
Aýstrııa (1D) — Túrkııa (2F)
Anglııa (1C) — Slovakııa (3E)
Shveısarııa (2A) — Italııa (2V)
