Ahmet Baıtursynuly gazettiń ataýy jaıynda: «Ataly jurtymyzdyń, aýdandy ultymyzdyń arýaqty aty dep gazetamyzdyń esimin «Qazaq» qoıdyq», deıdi. Osydan ańǵarǵanymyzdaı, ult zııalylary gazetti shyǵarýda ulttyń múddesin basty orynǵa qoıdy. Basylymnyń taralymy qazaq mekendegen barlyq aımaqqa jetip jatty. Tipti Reseı, Qytaı qazaqtary da tapsyrys berip, aldyrtyp oqyǵan. Akademık Muhtar Áýezovtiń: «Qazaqtyń eńkeıgen kári, eńbektegen jasyna túgelimen oı túsirip, ólim uıqysynan oıatyp, jansyz denesine qan júgirtip, kúzgi tańnyń salqyn jelindeı shıryqtyrǵan, etek-jeńin jıǵyzǵan «Qazaq» gazeti bolatyn», degen sózi – osy basylymnyń ult rýhanııaty jolynda atqarǵan eńbegine berilgen shynaıy baǵa.
«Jas Túrkistan»
«Jas Túrkistan» – Alash qaıratkeri Mustafa Shoqaıdyń bas redaktorlyǵymen 1929-1939 jyldary Fransııada, Berlınde jaryq kórip, 10 jyl boıy táýelsiz birtutas Túrkistan ıdeıasy jolynda aıanbaı kúres júrgizgen basylym. Eldiń egemendigin kóksegen jýrnalda kóterilgen máseleler búgingi Táýelsiz Qazaqstan muratymen ózektes.
Búkil túrki jurtymen qosa aldyńǵy qatarly shet memleketter «Jas Túrkistan» pikirimen sanasyp, keńes odaǵynyń resmı bıligi onyń ár sanyn qalt jibermeı qadaǵalap otyrdy. Basylym ózine basty baǵyt etip ustanǵan: «Biz, Túrkistan táýelsizdigin tý etýshiler, elimizdiń erki jáne jurtymyz, Túrkistannyń bostandyǵy úshin kúresemiz!» degen murattaryna jetý úshin aıanbaı kúresip, Alash azamattarynyń kókiregindegi aıaýly armandary men úkili úmitterin, amanattaryn búgingi kúnge jetkizdi. Sonysymen de qundy.
«Ana tili»
Respýblıkalyq «Ana tili» gazeti táýelsizdiktiń jylymyǵy ese bastaǵan 1990 jyly, Ulystyń uly kúni naýryzdyń 22-sinde jaryq kórdi.
Gazet ózi ómirge kelgen kúnnen bastap ult úshin qasıetti sanalatyn qazaq tiliniń jaı-kúıin jan-jaqty qozǵady. Jarylqap Beısenbaıulynyń redaktorlyǵymen gazet betinde ultqa qatysty ózekti máseleler kóterildi. Qazaqtyń aýly, qazaq mektebi, balabaqshasy, qazaq jastary, qazaq ǵylymy syndy kóptegen taqyryp qozǵaldy. Qandaı basylym bolsyn oqyrmanymen ordaly. Ult múddesin birinshi orynǵa qoıatyn gazettiń 90-jyldardaǵy taralymy 100 myńnan asyp jyǵyldy. Halyqtan «ult gazeti» degen ataý alýynyń ózi de – basylymnyń dárejesiniń kórsetkishi, halyqtyń marhabatyna bólengeniniń aıqyn belgisi.
