Foto: QHA
QHA-nyń «Júrekten júrekke» arnaıy jobasy aıasynda Qazaqstan halqy Assambleıasynyń ókilderi - QR Prezıdenti Ákimshiligi QHA Hatshylyǵynyń ınspektory Muhtar Quljan jáne «Qazaqstan halqy Assambleıasynyń Qory» qoǵamdyq qorynyń basshysy Rafık Mırzoev zardap shekkenderge baspana berý úshin sý tasqyny bolǵan óńirlerge arnaıy bardy.
QHA músheleri tarapynan Aqmola jáne Qostanaı oblystarynda turǵyn úıinen aıyrylǵan otbasylarǵa úıler satyp alyndy. Assambleıa ókilderi eń birinshi Qabıdenovtar otbasyn qýantty: Aqmola oblysy Jarqaıyń aýdany Derjavınsk qalasynyń turǵyndary erli-zaıypty Darhan men Ksenııaǵa úı berilip, kómek kórsetildi. Olardyń úıi sý tasqynynan qırap, qalpyna keltirý múmkin bolmaǵan.
Turǵyn úı alǵan kelesi turǵyn - Qostanaı oblysynyń Arqalyq qalasynan Aıman Kazova. Ol - tórt balany jalǵyz ózi tárbıelep otyrǵan ana. Arqalyq qalasynyń mańynda ornalasqan onyń úıin de qalpyna keltirý múmkin emes. Aımannyń quqyq belgileıtin qujattarmen de máseleler bolǵan. Sondyqtan baspana alýǵa úmitin úzip úlgergen edi. Assambleıanyń kómegi oǵan jańa úmit syılady.
Qostanaı oblysy Qarasý aýdanynyń Vostok aýylynyń turǵyny, bes balany tárbıelep otyrǵan Anna Kosolapova sý tasqyny saldarynan jalǵa alǵan úıinen aıyrylǵan. Onyń da quqyq belgileıtin qujattarymen máseleler bolǵan. Osy ýaqytqa deıin óz úıinde turýdy armandap kelgen Anna bul baqytty sátke sener senbesin bilmeı qýanyp jatyr.
«Biz Qazaqstan halqy Assambleıasyna qıyn kezeńderde qoldaý kórsetkeni úshin alǵys aıtamyz. Rasynda ǵajaıyptyń bolatynyna senim kúsheıdi», deıdi Anna Kosolapova.
Endi kóp balaly ana óziniń jańa páterine kóship, qonys toıyn toılaıdy.
QHA halyqtyń janynda júrip, tabıǵı apatqa baılanysty qıyn jaǵdaıǵa tap bolǵandarǵa kómek qolyn sozyp otyr. Úıler muqtaj jandarǵa berilip jatyr. Kómek kórsetiletin otbasylar kóp balaly, keıbiriniń asyraýshysy joq, balalarynyń múgedektigi bar, keıbiriniń quqyqtaryn belgileıtin qujattarmen máseleler týyndaǵan, jaldamaly páterde turatyny da turmaıtyny da bar.
Aıta keteıik, sý tasqynynyń alǵashqy kúnderinen bastap QHA tabıǵı apatqa qarsy kúreste kómegin aıaǵan joq. Aımaqtardaǵy Dostyq úılerinde eriktiler ortalyqtary men gýmanıtarlyq kómekterdi qabyldaý pýnktteri ashyldy, onda 12 myńnan astam eriktiler eń aýyr jáne qaýipti ýchaskelerde kómek kórsetti. О́ńirlik QHA ókilderi zardap shekken óńirlerge 1727 tonnadan astam azyq-túlik jáne alǵashqy kezde qajet taýarlardy jiberdi. Sondaı-aq 85 júk mashınasymen gýmanıtarlyq kómek jóneltildi (ortasha jáne aýyr júk fýralary jáne t.b.), 60 arnaıy tehnıka (ekskavatorlar, Kamazdar, samosvaldar jáne t.b.) tartyldy. Kórsetilgen gýmanıtarlyq kómek somasy - 807,4 mln teńgeden astam. Sondaı-aq, qurylys materıaldarymen de kómek kórsetildi.
QHA-nyń sý tasqynynan zardap shekken turǵyndardy turǵyn úımen qamtamasyz etý baǵytyndaǵy jumysy áli de jalǵasyn tabady.
