Kollaj: ulysmedia.kz
Depýtattyń aıtýynsha, Keshirim jasaý máseleleri jónindegi komıssııa Kárim Másimovtyń isi boıynsha talqylaý jıynyn ótkizdi.
«QR Prezıdenti janyndaǵy Keshirim jasaý máseleleri jónindegi komıssııanyń mindeti – keshirim jasaý týraly materıaldardy aldyn ala qaraý. Komıssııa Prezıdent janyndaǵy konsýltatıvtik-keńesshi organ bolyp sanalady. Komıssııanyń qyzmeti Memleket basshysynyń jarlyǵymen bekitilgen arnaıy erejemen retteledi. Apellıasııalyq shaǵym berilgennen keıin, ol tirkeledi, suraýlar Ishki ister mınıstrliginiń Qylmystyq izdestirý departamentine, Bas prokýratýraǵa jáne Joǵarǵy Sotqa joldanady», dep jazdy Marat Báshimov Facebook paraqshasynda.
Ol keshirim jasaý jónindegi komıssııanyń quramyna úkimettik emes uıymdardyń ókilderi, ǵalymdar, túrli organdardyń ókilderi, Qazaqstandaǵy Adam quqyqtary jónindegi ýákil, Prezıdenttiń quqyqtyq máseleler jónindegi kómekshisi, Bas prokýrordyń orynbasary jáne Ishki ister mınıstrliginiń Qylmystyq atqarý komıtetiniń tóraǵasy kiretinin naqtylady.
Marat Báshimov jazǵandaı, Konstıtýsııanyń 44-babynda: «Qazaqstan Respýblıkasynyń Prezıdenti: 15) azamattarǵa keshirim jasaıdy» delingen. Bul onyń ǵana konstıtýsııalyq quqyǵy.
«Kez-kelgen azamat Memleket basshysyna keshirim jasaý týraly ótinishpen júgine alady. Komıssııanyń sońǵy otyrysynda keshirim jasaý týraly keıbir materıaldar aldyn ala qaraldy. Merzimdi eki jylǵa qysqartý arqyly keıbir oń usynystar qarastyrylǵan. Jýrnalısterdiń K.Másimovke raqymshylyq jasaý máselelerin qaraýǵa qatysty saýalyna komıssııa ony qabyldamaýdy usyndy», dep qosty depýtat.
Eske sala keteıik, 2024 jyldyń maýsym aıynda memleketke opasyzdyq jasaǵany úshin sottalǵan QR Ulttyq qaýipsizdik komıtetiniń burynǵy basshysy Kárim Másimov raqymshylyq jasaý týraly ótinish jazǵany habarlanǵan edi.
