Shpagamen semserlesýde elimizdiń erler quramasy Azııa chempıonatyndaǵy qarsylastaryn aıqyn eńserdi. Tipti fınaldyq tartysta 2021 jyly ótken Tokıo jazǵy Olımpıda oıyndarynyń chempıony Japonııa quramasyn aıqyn utty. Al irikteý synynda Qatar, Qyrǵyzstan, Gonkong quramasyn yǵystyrdy. Osylaısha, Erlik Sertaı, Elmır Álimjanov, Rýslan Qurbanov, Vadım Sharlaımov tórttigi qurlyqta qara úzdi. Shilde aıynyń sońyn ala túligi túrilip, jalaýy jelbireıtin HHHIII Parıj jazǵy Olımpıada oıyndarynda osy jigitter el senimin aqtaý úshin baryn salady.
Memlekettik jattyqtyrýshy Tımýr Baıtasov elimizdiń komandasy 2015 jyldan beri Azııa qurlyǵynda jeńis tuǵyryna kóterile almaı kelgenin aıtty. «Jigitterdiń jeńisi orasan tabys dep maqtaýǵa turarlyq. Sebebi olar fınalda álemdik reıtıngtegi kóshbasshy komandanyń biri, jazǵy Olımpıada oıyndarynyń chempıony, álem chempıony Japonııa quramasyn jeńdi. Toǵyz jyldyń ishinde bizdiń jigitter Azııa chempıonatynyń fınalyna deıin úsh ret jetip, kúmis medaldy mise tutty, bes márte qola júldeger atandy. Komandalyq rýhty janyp, erik-jigerdi qamshylaǵan shákirtterimiz japon sportshylarynyń aıbarynan yqqan joq», dedi Tımýr Baıtasov.
Qazaqstan quramasy Azııa chempıonatyndaǵy jeńisinen keıin álemdik reıtıngte tórtinshi satyǵa kóterildi. Ulttyq qurama músheleriniń endigi mejesi – Parıj jazǵy Olımpıadasynyń medali.
