Otandyq bıznesti qoldaý
Strategııa jáne aktıvterdi basqarý jónindegi basqarýshy dırektor Nıkolaı Kazýtınniń aıtýynsha, qor Úkimetpen birlesip ázirlengen satyp alýlardaǵy otandyq qamtý úlesin arttyrýǵa múmkindik beretin sharalardy iske asyrdy.
«Qoıylǵan mindetterdi iske asyrý sheńberinde qor birneshe baǵytta josparly jumys júrgizip jatyr. Búgingi tańda satyp alýǵa qatysýdyń barlyq tizbegi boıynsha otandyq taýar óndirýshilerdi qoldaýdyń 14-ten astam tetigi qarastyrylǵan. Satyp alýlar júıesiniń ashyqtyǵyn arttyrý maqsatynda Qarjy mınıstrligimen, Qarjy monıtorıngi agenttigimen, Sybaılas jemqorlyqqa qarsy is-qımyl agenttigimen, sondaı-aq «Satyp alýdyń biryńǵaı terezesi» aqparattyq júıesimen birlesip ázirlengen», dedi Nıkolaı Kazýtın.
Engizilgen ózgeristiń negizgisi – ofteık-kelisimsharttardyń úlesin arttyrý. Mysaly, bıyl portfeldik kompanııalardyń basshylary úshin ofteık-kelisimsharttardyń úlesin satyp alý qyzmetteriniń jalpy kóleminen 10% kem túspeıtin deńgeıde ulǵaıtý boıynsha paıdaly áser koeffısıenti (PÁK) belgilendi. Jańa óndiristerdi qurýǵa baǵyttalǵan baǵdarlama nátıjeleri boıynsha 74 joba maquldanyp, 145 mlrd teńge somasynda 595 ofteık shart jasaldy.
«Baǵdarlama ishki naryqta ónim tapshylyǵy bolǵan kezde 20 jylǵa deıingi merzimge ofteık-sharttar jasasý múmkindigin kózdeıdi. Kelisimshart jasasý kezinde óndirýshilerge, onyń ishinde iri kásiporyndarǵa óz óndirisiniń aınalasynda shaǵyn bıznes beldeýin qurý jónindegi mindettemeler belgileý múmkindigi kózdelgen. Sondaı-aq otandyq taýar óndirýshiler úshin jeńildikter qarastyrylǵan. Mysaly, olar tenderlik ótinimdi qamtamasyz etýdi engizýden bosatylyp, qor keminde 30% mólsherinde mindetti avans belgiledi», dedi «Samuryq-Qazyna Kontrakt» JShS bas dırektorynyń orynbasary Eldar Doskenov.
Qabyldanǵan sharalardyń ishinde otandyq taýarlardy satyp alý boıynsha mindettemelerdi oryndamaǵan jaǵdaıda qurylys-montaj jumystarynyń merdigerleri úshin jaýapkershilik kúsheıtildi, sondaı-aq qor kompanııalar toby satyp alatyn jumystar men qyzmetterdi jetkizýshilerge jergilikti óndirýshilerden taýarlardy satyp alý mindetteldi.
Elektrondyq satyp alý júıesiniń artyqshylyqtary
Satyp alý júıesin jetildirý de – mańyzdy faktor. Búgingi kúni júıede 160 uıymnyń taýary, jumysy men qyzmetteri satylady. Birqatar úderisti avtomattandyrýdyń arqasynda jetkizýshilerdiń qordy satyp alý qyzmetine qatysý rásimi jeńildetildi. Iаǵnı tehnıkalyq sıpattamalar, elektrondyq shot-faktýralar, tenderlik ótinimdi qamtamasyz etý jáne basqa da úderister kiredi.
Elektrondyq satyp alýdyń aqparattyq júıesin súıemeldeý departamentiniń dırektory Aıdos Mustafınniń sózinshe, júıe arqyly jylyna 3,7 trln teńgeden astam somaǵa satyp alý júrgizilip, 85 myńnan astam shart jasalady. Kún saıyn zakup.sk.kz platformasynda 250-den astam konkýrs ótkiziledi jáne olardyń árqaısysyna orta eseppen 5 áleýetti ónim jetkizýshi qatysady.
«Qazirgi ýaqytta júıede 104 myńǵa jýyq áleýetti ónim jetkizýshi tirkelgen. Júıe qor kompanııalarynyń qajettilikterin, satyp alý merzimderin, sharttaryn jáne básekelestik orta týraly aqparatty kórýge múmkindik beredi», dep atap ótti Aıdos Mustafın.
«Samuryq-Qazyna» satyp alýdyń ashyqtyǵyn qalaı baqylaıdy?
«Ashyqtyq deńgeıin arttyrý jáne zań buzýshylyqtardy boldyrmaý úshin qorda satyp alýdy baqylaý jónindegi ortalyqtandyrylǵan qyzmet jumys isteıdi. Osy jyldyń alǵashqy 6 aıynda osyndaı 3 000-nan astam ótinish qaralsa, ótken jyly 6 000-nan astam ótinish óńdelgen. Satyp alý josparlary, tender jáne qor men enshiles kompanııalardyń sharttary týraly aqparat qoljetimdi», dep atap ótti «Samuryq-Qazyna Kontrakt».
Sondaı-aq ótken jyldan bastap platformada jańa fýnksıonal iske qosyldy. Ol jerde áleýetti ónim berýshiler satyp alý tártibiniń jekelegen normalarynyń resmı túsindirmesimen tanysa alady.
Nuraı SAPARBEKOVA
