Ortalyq kommýnıkasııalyq qyzmetinde ótken baspasóz máslıhatynda Týrızm jáne sport vıse-mınıstri Serik Jarasbaev jeńil atletterimiz joldamany eseleı túsetinine senim bildirdi.
«Lısenzııalyq týrnırlerge qatysqan sportshylarymyz arasynda semserlesýshiler men oq atý sportynan dodaǵa qosylatyn sańlaqtarymyz joǵary nátıjege jetti. Jazǵy Olımpııa oıyndaryna alǵash ret engen breıkıng sportynan bizge de 1 lısenzııa buıyrdy. Tennıs pen erkin kúresten sportshylar kózdegen joldamany tolyqqandy enshileı almady, ókinishtisi, aýyr atletterimiz joldamasyz qalyp, jazǵy Olımpııa oıyndaryna qatyspaıdy. Mundaı olqylyq buryn-sońdy bolǵan joq», dedi spıker.
Parıj jazǵy Olımpııa oıyndaryna baratyn sportshylarymyz kıetin biryńǵaı formaǵa qatysty vıse-mınıstr eshqandaı kiltıpan joq dep atap ótti. Byltyr Qytaıdyń Hanchjoý qalasynda jalaýy jelbiregen jazǵy Azııa oıyndaryna barǵan delegasııaǵa arnaıy tigilgen formanyń sapasyna qatysty az syn aıtylǵan joq. Vıse-mınıstr 5 shildede sporttyq formany BAQ ókilderine tanystyrý sharasy ótetinin, sapasy, dızaıny týraly talqylaý bolatynyn jetkizdi.
Aýyr atletterimizdiń alamanǵa joldama oljalaı almaýy bizdiń rezervtiń áleýeti qanshalyqty ekenin aıqyndap bergendeı. Bul olımpııa oıyndarynan keıin de kezegi keletin tórt jyldyq dodasy bar. 2026 jyly Italııanyń Mılan men Kortına-d Ampesso qalasynda ótetin qysqy jáne 2028 jyly AQSh-tyń Los-Andjeles qalasy qabyldaıtyn jazǵy Olımpııa oıyndaryna qosatyn sportshylarymyzdyń da áleýetin búginnen baǵamdaý mańyzdy. Buǵan qatysty qoıylǵan saýalǵa jaýabynda vıse-mınıstr keshendi jumys atqarylyp jatqanyn jetkizdi.
«Elimizde rezervtegi sportshylardy daıarlaýǵa arnalǵan 510 balalar men jasóspirimder sport mektebi bar. Onyń ishinde olımpıadalyq sport túrlerine basymdyq beriledi. Sondaı-aq ár óńirde 20-ǵa jýyq Olımpıadalyq daıarlaý ortalyǵy jumys istep jatyr. Onyń ekeýi jazǵy respýblıkalyq daıarlaý ortalyǵy: Astana jáne Almaty qalalarynda ornalasqan.
Parıj olımpıadasymen ǵana shektelmeı, búginde 2028 jyly Los-Andjeleste, 2032 jyly Brısbende ótetin olımpıadalarǵa da daıyndyq keshendi júrgizilip keledi», dedi Týrızm jáne sport vıse-mınıstri Serik Jarasbaev.
Qazirgi ýaqytta lısenzııa jeńip alǵan barlyq sport túriniń ereksheligin, fızıologııasyn jáne qajettilikterin eskere otyryp, jeke jospar boıynsha daıyndyq pysyqtalyp jatyr. Daıarlaý jumystaryn júıeli júrgizýi úshin 10 sport túrinen 14 sheteldik maman da shaqyrylǵan.
«Memleket basshysynyń tapsyrmasy boıynsha sport salasyndaǵy basqarý ınstıtýttary arasynda tıimdi kommýnıkasııalardy úılestiretin jáne qamtamasyz etetin shtab quryldy. Sportty damytý dıreksııasy, Týrızm jáne sport ındýstrııasyn qoldaý qory tarapynan sportshylardy sapaly daıarlaý úshin barlyq múmkindik jasalyp otyr. Ásirese medısınalyq, farmakologııalyq quraldarmen jáne sporttyq tamaqtanýmen qamtamasyz etý jolǵa qoıyldy», dedi Serik Jarasbaev baspasóz máslıhatynda.
Fransııaǵa attanatyn delegasııa quramynda 118 adam bar. BAQ ókilderi, dárigerler, jattyqtyrýshylar, sportshylar syndy delegasııa músheleri akkredıtteýden ótip, Shengen vızasyn aldy. Sportshylardyń arasynan aldymen eskek esýshiler attanady. Olar jattyǵý jıynyn Fransııanyń Gravlın qalasynda ótkizip, birden Parıjge ushady. 22 shildede Astanadan 4 komanda, Almatydan 10 komanda, sondaı-aq Eýropada jıynda júrgen jáne jarysqa qatysyp júrgen 13 komanda Olımpıadaǵa jol tartpaq.
Serik Jarasbaev Parıj jazǵy Olımpııa oıyndarynda medal oljalaıdy dep úmit artqan sportshylar arasynan 54 sportshyǵa basa ekpin berilip, daıyndyqtaryna aıryqsha kóńil bólinip otyrǵanyn atap ótti. «Olar joǵary nátıjemen oralady dep úmit etemiz. Sondyqtan da keshendi jattyǵýy úshin ǵylymı top jumys istep otyr. Medısınalyq tekserýden ótkizý, farmakologııalyq qajettilikpen qamtamasyz etý, tamaqtanýyna deıin júıeli júzege asyrylady», dedi spıker. Ár sportshynyń jeke daıyndyǵyn bas bapker ǵana emes, federasııa basshylyǵy da baqylaýǵa alyp, jiti qadaǵalap otyrǵanyn jetkizdi.
Parıj Olımpıadasynyń saltanatty ashylý rásiminde elimizdiń delegasııasyn bastap, tý ustap shyǵýshylar da belgili. Bokstan álem chempıony, ulttyq quramanyń kapıtany Aslanbek Shymbergenov pen jeńil atlet Olga Safronovaǵa kók týymyzdy kóterip shyǵý júktelmek. Rezervte grek-rım kúresiniń balýany Nursultan Tursynov pen semserlesýshi Áıgerim Sarybaı da tur.
