Sondaı-aq ol ShYU-nyń joǵary organy uıymǵa múshe memleketter basshylary keńesiniń otyrysyna qatysý ózi úshin úlken mártebe bolǵanyna, uıym basshylary kezdesýiniń qorytyndysy týraly habardar etýdiń mańyzdy ekenine toqtaldy.
– Astana sammıti uıym qyzmetiniń barlyq baǵyty boıynsha, ásirese saıasat jáne qaýipsizdik, saýda jáne ınvestısııa, kólik jáne energetıka, mádenıet jáne gýmanıtarlyq baılanys baǵytyndaǵy kópjaqty yntymaqtastyqty damytý keleshegin talqylaýǵa arnaldy. Is-shara barysynda halyqaralyq jáne óńirlik kún tártibindegi ózekti máseleler tóńireginde mazmundy pikir almastyq. Bul rette qaýipsizdikti qamtamasyz etý jáne ShYU keńistigindegi «úsh zulym kúshpen» kúresýdiń qajettiligi erekshe atalyp ótti. Kezdesýge qatysýshylardyń sammıt barysynda bergen baǵasyna súıensek, Uıym óz tarıhynyń úshinshi onjyldyǵynda ózara senim men dostyq ráýishtegi tatý kórshilik qarym-qatynastardy nyǵaıtýdyń, kópjaqty dıalogti keńeıtýdiń jáne ózara tıimdi yntymaqtastyqty tereńdetýdiń berik alańyna aınaldy. Qazirgi halyqaralyq qatynastar júıesinde ol kúrdeli geosaıası jaǵdaılarda turaqtylyqty saqtaýda sheshýshi ról atqaratyn bedeldi qurylym bola aldy, – dedi Chjan Mın.
Sonymen qatar Bas hatshy uıym aımaǵynyń turaqty damýy men órkendeýin qamtamasyz etý, ShYU Jarǵysynyń maqsattary men mindetterin qatań saqtaý, «Shanhaı rýhynyń» myzǵymas qaǵıdattaryn tabandy túrde ilgeriletý úshin túrli saladaǵy is júzindegi yntymaqtastyqty odan ári arttyrý qulshynysy basa aıtylǵanyn jetkizdi.
Baspasóz máslıhatynda Chjan Mın 25 qujat qabyldanyp, ShYU-ǵa múshe memleketter basshylary keńesiniń Astana deklarasııasy maquldanǵanyn atap ótti.
– ShYU-nyń «Ádiletti beıbitshilik, kelisim jáne damý úshin dúnıejúzilik birlik týraly» bastamasyn qurý týraly sheshim qabyldanyp, Sındao qalasy 2024-2025 jyldarǵa arnalǵan ShYU-nyń mádenı jáne týrıstik astanasy mártebesine ıe boldy. Tatý kórshilik, senim jáne seriktestik qaǵıdattary týraly múshe memleketter basshylary keńesiniń málimdemesi retinde MBK-nyń 3 málimdemesi jarııalandy, – dedi Chjan myrza.
Bas hatshy sammıttiń negizgi nátıjeleriniń biri retinde Belarýs Respýblıkasynyń uıymǵa múshe retinde qosylý úderisiniń aıaqtalýyn erekshe atap ótti. Nátıjesinde, ShYU músheleri on memleketke deıin artty. Hatshylyq delegasııasy Beıjińge oralǵannan keıin ShYU «otbasy» elderiniń dıplomatııalyq ókildikteri basshylarynyń qatysýymen uıym shtab-páteriniń aldynda Belarýs Respýblıkasynyń memlekettik týyn kóterýdiń saltanatty rásimi ótetinin habarlady.
Budan bólek, ol ShYU jáne onyń turaqty jumys isteıtin organdarynyń qyzmetin odan ári jetildirýdiń basym mindetterine, sondaı-aq keıingi ýaqytta óte belsendi jumys atqaryp kele jatqan uıymdy keńeıtý úderisine erekshe mán beriletinin aıtty.
Sóziniń sońyna qaraı elimizdiń tóraǵalyǵyna toqtalyp, Qazaqstan taraby ekonomıka, ınvestısııa, kólik, mádenı-gýmanıtarlyq sala máselelerine, sondaı-aq ekologııalyq aspektilerge erekshe nazar aýdarǵanyn jetkizdi.
– Bizdiń oıymyzsha, Qazaqstannyń Uıymǵa tóraǵalyǵy óte mazmundy ári qyzyqty boldy. Uıym qyzmetine jańa serpin berip, onyń tarıhyndaǵy taǵy bir mańyzdy kezeńge aınalǵan Astana sammıti bárimiz úshin tıimdi de syndarly jáne jemisti nátıjege qol jetkizdi. Osy múmkindikti paıdalana otyryp, Qazaqstan Respýblıkasynyń Prezıdenti Qasym-Jomart Toqaevty osy basqosýdyń jáne jalpy tóraǵalyǵynyń sátti ótýimen ystyq yqylaspen quttyqtaǵym keledi. Maǵan jáne Hatshylyq delegasııasyna jumys barysyndaǵy kórsetilgen erekshe qoldaý men kómek úshin, sondaı-aq jyly shyraımen jáne qonaqjaı qalyppen qabyldaǵany úshin Qazaqstandaǵy áriptesterimizge alǵysymdy bildirgim keledi, – dedi uıym Bas hatshysy Chjan Mın.
Astana sammıtinen keıin tóraǵalyq estafetasyn Qytaı Halyq Respýblıkasy qabyldady. Jalpy, Qytaı ShYU-nyń negizin qalaýshy el sanalady, ári uzaq jyldar boıy uıymnyń damýyna barynsha úles qosyp keledi.
