Foto: gov.kz
Ákimshilik quqyq buzýshylyq týraly kodekske sáıkes, túnde tynyshtyqty buzǵan adamdarǵa 2024 jyly 18 460 teńge - 5 AEK kóleminde aıyppul salynady. Zańbuzýshylyq bir jyl ishinde qaıtalansa, aıyppul somasy eki eselenedi.
«Ákimshilik zańnamaǵa sáıkes, jumys kúnderi saǵat 22:00-den 9:00-ge deıin, demalys jáne mereke kúnderi saǵat 23:00-den 10:00-ge deıin azamattardyń tynyshtyǵyn buzýǵa bolmaıdy, ıaǵnı adamdardyń, onyń ishinde kórshilerdiń qalypty demalýyna kedergi keltirmeý qajet. Sondaı-aq turǵyn úılerde jáne turǵyn úı qurylysy aýmaqtarynda ornalasqan oıyn-saýyq mekemeleriniń tynyshtyqty buzýy 20 AEK aıyppul túrindegi ákimshilik jazaǵa ákep soǵady. Osyǵan baılanysty odan keıingi moraldyq jáne materıaldyq shyǵyndardyń aldyn alý úshin turǵyndardy ózara túsinistikke, basqalardyń, onyń ishinde kórshilerdiń tynyshtyǵyn qurmetteýge shaqyramyz», dedi Aqtóbe oblysy Polısııa departamenti jergilikti polısııa qyzmeti basqarmasynyń aǵa ınspektory Jandarbek Álibaev.
Jyl basynan beri Aqtóbe oblysynda 2800-den astam adam polısııaǵa júgingen. Mundaı zańbuzýshylyqtar ásirese jaz aıynda bolady.
