Ispanııa – tórt dúrkin Eýropa chempıony

Fınalǵa shyqqan Anglııa qu­ramasy ıspan fýtbolshylaryna qarsy tartysty oıyn órnegin kórsetti. 1-taımda Ispanııa quramasy dúrkin-dúrkin shabýyldap, qys­paqqa alǵanymen, qaqpashy Pıkford birneshe soqqyny toıtaryp, quramasyn qutqardy. Biraq taım aralyǵyndaǵy úzi­listen alańǵa Ispanııa ulttyq qu­ramasy tyń kúshpen shyqqandaı áser qal­dyrdy. 47-mınýtta Nıko Ýılıams­tyń golynan alǵa uzap shyqqan qar­sylastaryn qansha tyqsyrǵanymen, aǵylshyn fýtbolshylarynyń shabýyly nátıjeli bolǵan joq. Tek 73-mınýtta Koýl Palmer enshisine gol jazyp, esepti teńestirdi. Jeńis golyn 86-mınýtta Mıkel Oıarsabal soqty. 90-mınýttaǵy standartty shabýylda aǵylshyndar tarazy basyn teńestiretin tamasha múmkindik alǵan. Gehı Marktiń baspen súze soqqany sózsiz Ispanııa quramasynyń qaqpasynda týlaıtyn edi, eger jartylaı qorǵaýshy Danı Olmo bolmaǵanda.

1964 jyly ótken Eýropa chempıo­natynyń fınaldyq alamanynda SSSR quramasyn 2:1 esebimen jeńip, qurlyqtyń úzdigi atanǵan ıspan fýtbolshylary arada ótken alpys jylda tórtinshi márte chempıondyq ataqqa qol jetkizip otyr. 2008 jyly Eýropa birinshiliginiń fınaldyq tartysynda Germanııa qura­masyn 0:1 esebimen eńsergen Ispanııa fýtbolshylary 2012 jyly da sol bıiginen tómendegen joq. Tipti qurlyq báıgesiniń kýbogi úshin fınalda Italııa quramasyn 4:0 esebimen eseńgirete jeńgeni jurt esinde. Odan beri de bir múshel ýaqyt ótti. Ispanııa quramasy Eýropa chempıonatynda toptan shyqqanymen, fınalǵa jetpeı súrindi. Ulttyq quramanyń búgingi býyny sózsiz myqty ekenin aıqyn dáleldep berdi.

1960 jyldan beri uıymdastyrylatyn Eýropa chempıonatynyń fınaldyq matchynda gol soqqan eń jas fýtbolshy Petro Anastazıdiń 1968 jylǵy jetis­tigin eshkim jańarta almaı keledi. 1968 jyly ótken Eýropa chempıonatynyń fınaldyq tartysynda Italııa quramasy Iýgoslavııa fýtbolshylaryn 2:0 esebimen jeńdi. Ekinshi goldy 31-mınýtta soqqan Anastazı sonda 20 jastan 64 kún asqan edi. Anglııa men Ispanııa quramalary arasyndaǵy tartysta gol soqqan Nıko Ýılıams pen Kol Palmer de – 22-den asqan fýtbolshylar. Eger 17 jasqa tolǵan Lamın Iаmal fınalda gol soqqanda tarıhı nátıje tirkeler edi.

Anglııa ulttyq quramasynyń bas bapkeri Garet Saýtgeıt shákirtteri match­tyń aqyrǵy mınýttarynda shar­shaǵanyn aıtty. «Ekinshi taımnyń sońynda bizdiń esepti teńestiretin tamasha múmkindigimiz boldy. Jigitter baryn salyp oınady, Ispanııa quramasy talassyz tańdaýly ujym ekenin áıgiledi. Alpys jyldan beri jalynan ustatpaı kele jatqan Eýropa chempıonatynyń kýbogin qushaǵymyzǵa qysar edik jeńiske jetkende», dedi G.Saýtgeıt.

Ispanııa ulttyq qura­masynyń enshi­sine Eýropa chempıonatynyń kýbogin tór­tinshi márte bóktergen bas bapker Lýıs De la Fýente alamanǵa «men jastarǵa senemin» dep kelgenin kórsetti. Bul bapker 2015 jyly Ispa­nııanyń 19 jasqa deıingi jastar quramasyn baptap, Eýropa chempıony atandy. Fınaldyq tartys­ta Reseı jastar quramasyn 2:0 esebimen utty. Osy matchta alańǵa shyqqan Rodrı keshegi oıynda da jasyndaı jarqyldady. Qaqpany qoryǵan Ýnaı Sımon toǵyz jyl buryn De la Fýenteniń qanatynyń astynda qosalqy quramda otyrdy. 2019 jyly 21 jasqa deıingi jastar arasynda ótken Eýropa chempıonatynyń fınaldyq tartysynda Lýıs De la Fýente shákirtteri Germanııa jastaryn eńsergen edi. Osy matchta Mıkel Oıarsabal, Ýnaı Sımon, Danıel Olmo syndy sańlaqtar sapta boldy.

2022 jyldyń jeltoqsanynda Is­panııa ulttyq quramasynyń bas bapkeri qyzmetine 61 jastaǵy Lýıs De la Fýente taǵaıyndaldy. Mundaı laýazymdy qyzmettiń jaýapkershiligin arqalaǵanǵa deıin jastar quramasyn Eýropa chempıony atandyrǵan mamannyń biliktiligi birden baıqaldy. Byltyr ÝEFA Ulttar lıgasynyń fınaldyq saıysynda Fýen­te bapkerdiń shákirtteri Horvatııa qura­masyn penaltı serııasynda (esep 4:5) eńserip ketti.

Jastar quramasynyń sapynan beri baýlyp kele jatqan shákirtteri bap­kerdiń senimine selkeý túsirmedi. «Birinshi taımda gol soǵylǵan joq, úzilisti anaý aıtarlyqtaı aqylgóılik tanytpadym. Tek biz qashanda ózimizdiń tegeýrindi qurama ekenimizdi dáleldeı alatynymyzǵa sendirdim, boldy. Men bul ujymnyń jetistigimen qashanda maqtanamyn», dedi Lýıs De la Fýente.

Ispanııa quramasy Eýropa chempıo­natynyń fınaldyq dodasyn tórt ret jeńgen jalǵyz ujym atandy. Germanııa quramasy úsh ret jeńse, Italııa, Fransııa quramalarynyń enshisine Eýropa chempıony degen ataq eki ret buıyrdy. Anglııa quramasy qatarynan ekinshi ret qurlyq alamanynyń fınaldyq dodasyna jetke­nimen, joly bolmady. Olar 2021 jyly ótken Eýropa chempıo­natynyń fı­naldyq tartysynda Italııa quramasyna ese jiberdi.