Qaısar jandardyń qas qaǵym sáti

«Astana – Parıj 2024: parasport jáne Paralımpıada oıyndary – basty nazarda» degen ataýmen ótken fotokórmeni kópshilik tamashalady. Fransııanyń Ult­tyq merekesine oraı ári Parıj Olımpıadasynyń bastalýyna eki apta qalǵanda Fran­sııanyń Qazaqstandaǵy elshiligi, Ulttyq Paralımpıada komıteti, Asta­na qalasynyń ákimdigi jáne Dene múmkindikteri shekteýli tulǵalarǵa arnalǵan sporttyq daıarlaý ortalyǵy uıymdastyrǵan kórmede sport­shylardyń sýreti jurt nazaryna usynyldy. Ár portrettiń tusyndaǵy QR-kod arqyly tamashalaýshylar sportshy týraly tereńirek tanysyp biledi.

Atyraý kópirindegi kórmeni 14 tamyzǵa deıin qala turǵyndary men qonaqtary tamashalaı alady. Fransýz fotografy Dıde Eshlar men Ospan Áliniń nysanasyna ilingen fotodaǵy keı parasportshylar Parıj jazǵy paralımpıadasynda el úmitin arqalaıdy. Solardyń biri – Ja­ńyl Baltabaeva. Parakanoeden alǵash ret dodaǵa qo­sylatyn qaı­sar qyzdyń bul sport túrimen shuǵyldanǵanyna bir jyldan asypty.

«Men buǵan deıin qysqy sport, onyń ishinde shańǵydan Paralımpıada oıyndaryna qa­tystym, biraq júlde buıyr­mady. Parakanoe sportymen shuǵyldanǵanyma bir jyldan asty, osy ýaqyt aralyǵynda paralımpıada joldamasyn oljaladym, men úshin zor jetistik. Sebebi Majarstanda ótken álem chempıonatynda dúnıejúziniń tańdaýly eskekshilerimen do­daǵa túsip, lısenzııa ıelen­dim. Saýsaqtarymnyń joqtyǵynan jel soqqanda eskegimdi esý qıyn­­dyq týdyrdy. Soǵan qa­ra­mas­tan bapkerimniń aıt­qanyn tyńǵylyqty oryndap, tórt jylda aınalyp soǵatyn Par­alımpıada alamanyna qa­tysýǵa múmkindik aldym. Endi barymdy salyp, ázirlikti kúsheıtemin», degen Jańyl Baltabaeva bul sportta tek tártipke baǵynyp, bapkerdiń talabyn oryndaı alǵanda ǵana nátıje shyǵatynyn aıtty.

Qaısar qyz qysqy sportqa qaraǵanda jazǵy sport túri anaý aıtarlyqtaı aýyrlyq etpeıtinin jetkizdi.

«Shańǵy bıatlonnan saıysqa qatysqanda aıaǵyma da kóp kúsh túsetin, ústimizdegi kıimniń qa­lyńdyǵy da az júk emes. Jazǵy sportta, onyń ishinde eskek esýde ondaı qıyndyq týmaıdy. Biraq bul sporttyń da ózindik ereksheligi bar. Kimniń qajyr-qaıraty kúshti, tózimi myǵym, sondaı jandar ǵana nátıjege jetedi», dedi sportshy.
Májilis depýtaty Kenjeǵul Seıitjan mundaı is-sharalardy jıi uıymdastyrý arqyly múm­kindigi shekteýli jandardyń qaısarlyǵy men eńserip júrgen sporttaǵy jetistigin nasıhattaý mańyzdy deıdi. Ol parasporttan sportshylardyń álemdik dodalarda oljalaǵan medali men nátıjesi joǵary bolǵanymen, bólinetin qarajat áldeqaıda kemshin ekenin aıtty.

«Mundaı is-shara ne úshin kerek? Eń aldymen, halyqty para­sporttyń tynys-tirshiligimen tanystyrý úshin qajet. Kezinde golbol degen sportty damytyp, jetekshilik ettim, paravelosport federasııasynyń basshysy retinde bul salanyń oı-qyryn tereńdeı bilemin. Kásibı sportshylar sekildi parasportshylarǵa da qoıylar talap joǵary, saıys kezindegi básekelestik te álsiz emes. Mú­gedektigi bar sportshyny osyndaı dodaǵa daıyndaıtyn bapkerge júkteler jaýapkershilik te, salmaq ta orasan. Biraq jalaqysy mardymsyz. Parlament minbe­rinde bul máseleni dúrkin-dúr­kin qozǵap kelemin. Parasportty damytý arqyly da ult saýlyǵyn ny­ǵaıtamyz», dedi depýtat K.Seıit­jan.

28 tamyz ben 8 qyrkúıek ara­lyǵynda ótetin Paralım­pıada oıyndaryna sańlaqta­rymyz 8 sport túrinen 21 joldama ıelendi. Atap aıtqanda, parapaýerlıftıngten – 5, parajeńil atletıkadan – 3, parajúzýden – 4, voleıboldy otyryp oınaýdan – 1, paraústel tennısinen – 1, parataekvondodan – 3, parakanoeden – 2 jáne paraoq atýdan 2 joldama bar.