Budan bylaı 8 mıllıon teńgeden joǵary kredıt berilmeýi múmkin. Ekinshi deńgeıli bankterge kepilsiz nesıeni 2 myń 200 aılyq eseptik kórsetkish kóleminen artyq berýge tyıym salynbaq. Al ol teńgege shaqqanda 8 mıllıon 122 myń 400-di quraıdy. Mıkroqarjy uıymy da 4 mıllıon 61 myń tegeden artyq aqshany rásimdemeıdi. Mundaı shekteýlerdiń kepildendirilgen nesıelerge qatysy joq.
– Kepildi kredıt berý segmenti táýekeldi neǵurlym tómen bolatynyn eskere otyryp, somasyn shekteý kózdelmegen. Tıisti normatıvtik quqyqtyq akti jobasyn ashyq quqyqtyq normatıvtik aktiler portalynda jarııa talqylaý úshin ornalastyrdyq. Atalǵan ózgerister iri somalarǵa kepilsiz tutynýshylyq qaryzdar berýdi shekteýge múmkindik beredi, – dedi QR Qarjy naryǵyn retteý jáne damytý agenttigi departamentiniń bas mamany Nurbol Aıymqulov.
Qarjy naryǵyn retteý agenttiginiń aqparyna saı, 1 mamyrdaǵy derek boıynsha qazaqstandyqtardyń ekinshi deńgeıli bankter aldyndaǵy qaryzynyń kólemi 18 trıllıon teńgeni quraǵan. Al mıkroqarjy uıymdarynyń aldynda jeke jáne zańdy tulǵalardyń 1 trıllıon 300 mıllıard teńge bereshegi bar. Nesıesin ýaqytyly tóleı almaı júrgender taǵy bar. Buǵan ekonomıst Baqytjan Omarov kredıt berý somasyn shekteý qarjy naryǵyndaǵy kompanııalarǵa keri áserin tıgizedi dep otyr.
– Mundaı shekteý ekinshi deńgeıli bankterdiń turaqty klıentterine kesirin tıgizedi. Sebebi keıbir qarjy uıymdarynda 100 mıllıon, 150 mıllıon teńge nesıe alyp, ony op-ońaı tólep júrgen tutynýshylary bar. Eger lımıt qoıylsa, olar múldem nesıe ala almaı qalýy múmkin. Sonyń saldarynan kásibin dóńgeletip júrgen azamattardyń ekonomıkalyq jaǵdaıy álsireýi yqtımal, – dedi ekonomıst Baqytjan Omarov.
Kredıt somasyn shekteý týraly usynysty Qarjy naryǵyn retteý agenttigi Ashyq normatıvtik quqyqtyq aktiler portalyna jarııalady. Qujat 31 shildege deıin qoǵam talqysynda bolady. Bul usynys qoldaý tapsa, onda ekinshi deńgeıli bankter men mıkroqarjy uıymdary zańdy túrde belgilengen shekten asyryp, nesıe bere almaıdy.
Aıta keteıik, qazir bankter tutynýshyǵa qansha kredıt beretinin ózderi sheshedi.
