Oqý-jattyǵý jıynyna 12 sportshy qatysady: irikteýden ótken 10 sportshy jáne taǵy 2 sportshy rezervte bolady. Onyń ishinde 6 er adam, 4 qyz kóshpeliler oıyndarynyń erejelerine sáıkes jarystarǵa qatysady.
«Jattyǵýlar óte qarqyndy júrip jatyr, V Dúnıejúzilik kóshpeliler oıyndaryna az qaldy. Sondyqtan biz qazir jattyǵýdy kúsheıtip, jańa ádisterdi úırenip jatyrmyz. Sportshylarymyz halyqaralyq deńgeıde jaqsy nátıje kórsetip keledi. Búginde sporttyń osy túri boıynsha Kóshpeliler oıyndaryna qatysýǵa 35 el tirkelgen, bul degen 300-ge jýyq sportshy. Barlyǵy bizdiń sportshylarmen bir arenaǵa shyǵyp, birinshi orynǵa talasady. Osyndaı daıyndyq arqyly biz jaqsy nátıjelerge qoljetkize alamyz jáne sportshylarymyz tuǵyrda kók týymyzdy mindetti túrde kóteredi», dedi dástúrli sadaq atýdan Qazaqstan ulttyq quramasynyń aǵa jattyqtyrýshysy Dıas Ahmetov.
Daıyndyq barysy týraly dástúrli sadaq atýdan ulttyq qurama múshesi Erbol Tapenov aıtyp berdi.
«Men 5 jyldan astam ýaqyttan beri dástúrli sadaq atýmen aınalysyp kelemin. Bul erekshe sport, óıtkeni ol zeıindi, shydamdylyqty, tózimdilikti qajet etedi. Qazir V Dúnıejúzilik kóshpeliler oıyndaryna daıyndyqtan ótip jatyrmyz, irikteýden óttik, oıynǵa qatysýshylar quramyna kirdik. О́zimizdi joǵary deńgeıde kórsetemiz dep oılaımyn», dedi sportshy.
Esterińizge sala keteıik, respýblıkalyq sadaq atý federasııasy Ulttyq sport túrleri qaýymdastyǵynyń quramyna kiredi. Sonymen qatar qaýymdastyq quramyna báıge, kókpar, aýdaryspaq, asyq atý, jamby atý, teńge ilý, qusbegilik, JORYQ federasııalary da kiredi. Al qaýymdastyqty belgili kásipker, mesenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov basqarady.
