Birigip jumys isteýdi tapsyrdy

Keshe Mádenıet jáne sport mınıstrliginde qysqy jáne jazǵy sport túrleri federasııalary jumysynyń qory­tyn­­dysy men federasııalardyń mınıstrlikpen ózara árip­tes­ti­gin odan ári jetildirý máselesine arnalǵan jıyn ótti. Oǵan Premer-Mınıstrdiń orynbasary Berdibek Saparbaev qatysty. Jıynda Mádenıet jáne sport mınıstri Arystanbek Muhamedıuly ótken jyl­da atqarylǵan jumystar týral­y baıandama jasady. Ol sport fede­ra­sııalarynyń jumysy, sport­shylardyń byltyrǵy jetis­tik­teri, buqaralyq sportty damytýda istelingen sharalar týraly aıtyp, mınıstrliktiń aldaǵy kezge josparlanǵan jumystaryna keńinen toqtaldy. Onda mınıstr  2016 jyly Rıo-de-Janeıroda ótetin Olımpııa oıyndaryna qazaqstandyq sportshylar keminde 115 lısenzııa ıelenýi kerektigin, osy maqsatta sportshylarymyzdy jarystarǵa daıyndaý jumysyna basa nazar aýdarylyp jatqanyn atap ótti. Onyń aıtýynsha, Olımpıadaǵa sport túrleri boıynsha lısenzııa­lar ıelený jospary bekitilgen. «Osyǵan baılanysty elimizdiń ulttyq qurama komandalary London Olımpıadasynan kem lısenzııa ıelenbeýi kerek. Bıyl sportshylarymyz Olımpıada joldamasy sarapqa salynatyn jarystarǵa qatysady. Osy syndardan súrin­beı ótý úshin otandastarymyz jarys­tar­ǵa tyńǵylyqty daıyndalýy kerek», dedi ol. Sonymen birge, A.Muhamedı­uly ulttyq qurama komandalardyń sapaly daıyndyqtaryn qamtamasyz etý úshin «Samuryq-Qazyna» qory tarapynan qosymsha qarjylandyrý máselesi sheshilse degen usynysyn aıtty. Odan keıin vedomstvo basshysy konkı tebýshilerdiń kásipqoı klýbyn ashý qajettigi týraly másele kóterdi. Onyń aıtýynsha, qazirgi kezde qysqy sport túrlerin damytý ózekti máselege aınalyp otyr. Búginde elimizde qysqy sporttyń 15 túri boıynsha 8 federasııa men 2 qaýymdastyq qyzmet etip keledi. Alaıda, elimizdiń qysqy sporttaǵy nátıjesi kóńil kónshiterlik emes.  «Sondyqtan konkı tebýshilerdiń kásipqoı klýby qurylsa,  sport­shy­larymyzdyń Olımpıada, Azıa­da sııaqty keshendi jarystarǵa daı­yndyǵy jaqsarar edi», dedi ol. Osy jerde mınıstr taǵy da bul jobany «Samuryq-Qazyna» qorynyń qoldaýynsyz júzege asyrý múmkin emestigin atap ótti. Jalpy, ol qysqy sport máselesine kelgende sportshylardy sport nysandarymen, jat­tyǵatyn jerlermen qamtamasyz etý kerektigin aıtty. Osydan keıin mınıstrliktiń Sport jáne deneshynyqtyrý iste­ri komıtetiniń tóraǵasy Elsııar Qa­naǵatov, Ulttyq paralımpıa­da komıtetiniń prezıdenti Dar­han Qaletaev, Aýyr atletıka fe­de­ra­sııa­synyń prezıdenti Janat Túsipbekov,  Shańǵy sporty túrleri qaýym­dastyǵynyń vıse-prezıdenti Vladımır Smırnov, Dzıýdo federa­sııasynyń bas hatshysy Abaı Qaı­ma­qov sóz sóılep, byltyrǵy jyly atqarylǵan jumystary týraly aıtyp berdi. Jıyn sońynda B.Saparbaev sport federasııalarynyń jumysy men sportshylardyń jarysqa daı­yn­dyǵyn jaqsartý máselesine qatys­ty óz oıyn bildirdi. Ol aldy­men  fýtbol federasııasynyń jumysyn synǵa aldy. Úkimet basshysynyń orynbasary bizdiń elde kóbine syrttan kelgen fýt­bolshylarǵa jaǵdaı jasalatynyn, al balalar men jasóspirimder fýtbolyna tıisti deń­geıde kóńil bólinbeıtinin es­kertti. Onda ol óz eline qajeti bolmaı qalǵan kelimsekterge myńdaǵan dollar aqsha tólegenshe, óz elimizdiń jetkinshekterine jaǵdaı jasap, sport alańdaryn salyp bergen áldeqaıda mańyzdyraq dep qadap aıtty. Degenmen, ol Qazaqstan fýtbol federasııasynyń jańa basshylyǵy jaqsy nátıjeler kórsetýge tyrysady degen senim bildirdi. Premer-Mınıstrdiń orynbasary jaqsy nátıje kórsetip júrgen boks, aýyr atletıka, tennıs federasııalarynyń jumysyn oń baǵalady. Al qysqy sportqa kelgende B.Saparbaev Shýchede salynyp jatqan olımpıadalyq bazanyń qurylysyn tezdetip, qysqy sportqa arnalǵan sport nysandaryn kóbeıtý kerektigin atap ótti. Osydan keıin ol sportpen aınalysatyn Qazaqstan halqynyń úlesi 30 paıyzdan kem bolmaýy kerektigin,  bul – Elbasynyń júktegen mindeti ekenin eske saldy. Odan ári B.Saparbaev sport federasııalaryna jumysty jaqsartý úshin Sport komıtetimen, jergilikti bılik organdarymen jáne demeýshilermen jumys isteýdi tapsyrdy. Dastan KENJALIN, «Egemen Qazaqstan».