Denesiniń kóp bóligin kúıik shalǵan jumysshylar H.Maqajanov atyndaǵy kópbeıindi aýrýhanada em-dom qabyldap jatyr.
«Naýqastardyń kóbi termııalyq kúıik alǵan. Beseýinde kúıik dárejesi 70 pen 100 paıyzdyń arasynda. Basy, aıaq-qoly ǵana emes, taǵy da ıngalıasııalyq kúıikpen zaqymdanǵan. Sondyqtan jaǵdaılary óte aýyr. Dárigerler naýqastardy jiti baqylap, edel-jedel em-domyn jasap jatyr», deıdi Professor H.Maqajanov atyndaǵy kópsalaly aýrýhananyń travmatologııa ortalyǵynyń basshysy Berik Tileýbaev.
Densaýlyq saqtaý mınıstrliginiń tapsyrmasymen qosymsha medısınalyq kómekti kórsetý úshin Qaraǵandyǵa Akademık N.Bátpenov atyndaǵy Ulttyq travmatologııa jáne ortopedııa ǵylymı ortalyǵynyń dırektory Oljas Bekarysov bastaǵan qyzmetkerler arnaıy keldi. Medısınalyq toptyń quramynda tájirıbeli kombýstıolog-reanımatologter bar.
О́kinishke qaraı, dárigerler 30 jastaǵy Muzafar Ismaılovtyń janyn arashalaı almady. Marqumnyń denesiniń 85 paıyzy kúıgen. Qaraly habardy kompanııa jetkizip, otbasyna barynsha kómek kórsetemiz dedi.
«Áriptesimiz, pesh bastyǵy Muzafar Ismaılov aýrýhanada qaıtys boldy. Biz Muzafardyń otbasy men onyń jaqyndaryna osynaý qıyn sátte qaıǵylaryna ortaqtasyp, kóńil aıtamyz. Sondaı-aq onyń otbasy músheleriniń osy qıyn kezeńnen ótýi úshin qoldan kelgenniń bárin jasaımyz», dep habarlady «YDD Corporation» kompanııasy.
«YDD Corporation» qaza bolǵan qyzmetkeriniń otbasyna qajetti qoldaýdy kórsetemiz dep ýádesin berdi. Naqty aıtqanda, marqumdy aqtyq saparǵa shyǵaryp salý shyǵyndary men onyń otbasynyń barlyq nesıesin jaýyp, turǵyn úı jaǵdaıyn jaqsartýǵa kómek beredi. Onymen qosa kompanııa 10 jyldyq jalaqy mólsherinde qarjylyq kómek tóleıdi.
Ferroqorytpa zaýytynda bolǵan jazataıym oqıǵanyń sebebi men mán-jaıdy anyqtaý úshin eńbek zańnamasyna sáıkes arnaıy komıssııa quryldy. Ony Eńbek ınspeksııasy basqarmasynyń basshysy Murat Qarakekilov basqarady. Komıssııa quramynda barlyq ýákiletti memlekettik organdardyń ókilderi bar.
Oqıǵa orny tekserilip, jazataıym oqıǵanyń kýágerlerine saýalnama júrgizildi, tehnıkalyq qujattamamen tanysý jumysy júrip jatyr.
Zaýyttaǵy oqys oqıǵany tergep-tekserý oblys basshylyǵynyń turaqty baqylaýynda. Oblys ákimi Ermaǵanbet Bólekpaev zardap shekken qyzmetkerlerdiń týystarymen kezdesti. Sonymen qatar dárigerler málimetin tyńdady.
«Ferroqorytpa zaýytynda bolǵan oqys jaǵdaıdan, ókinishke qaraı, 8 qyzmetker zardap shekti, bireýi qaza boldy. Zardap shekken azamattarǵa qajetti medısınalyq kómek kórsetilip jatyr. Medısına qyzmetkerleri qoldan kelgenniń bárin jasaıdy», dedi oblys ákimi.
Tórt adamnyń jaǵdaıy óte aýyr, úsheýiniń jaǵdaıy kúrdeli. Bul týraly oblystyq densaýlyq saqtaý basqarmasynyń basshysy Bıbigúl Tólegenova habarlady.
Bul oqıǵaǵa baılanysty ferroqorytpa zaýytynda Qylmystyq kodekstiń 156-babynyń 2-bóligi boıynsha, ıaǵnı «Abaısyzda densaýlyqqa aýyr zııan keltirýge ákep soqqan eńbekti qorǵaý erejelerin buzý» boıynsha qylmystyq is te qozǵaldy. Tergeý sharalary boıynsha qorytyndy jasalady.
Qaraǵandy oblysy
