Atyraý oblystyq dzıýdo federasııasynyń vıse-prezıdenti, belgili bapker Bımyrza Taıjanovtyń aıtýynsha, elimizdiń ár óńirinde halyqaralyq saıystarda el namysyn qorǵap júrgen sańlaq dzıýdoshylar az emes. Sonyń qatarynda Ábıba Ábýjaqynovanyń esimi aldymen atalady. О́ıtkeni qazaq jerinen tysqary elde ómirge kelgenimen, júregi qazaq dep soǵatyn ultjandylyǵy menmundalap turady. Ata-anasymen elge qonys aýdarǵannan beri sporttaǵy baǵy jandy deýge bolady. Ony keıingi 4-5 jyldan beri atyraýlyq bapker Meırambek Esmaǵambetov jattyqtyryp keledi.
«Ár sportshynyń armany – Olımpıada chempıony ataný. Al Ábıba Ábýjaqynovanyń Olımpıadaǵa deıingi júldesi jeterlik. Ol – dzıýdodan el chempıony. 2021 jyly Bishkekte, 2022 jyly Astanada ótken Azııa chempıonatynda kúmis júldeni ıelendi. Budan eki jyl buryn Tashkenttegi Álem chempıonatynda qola júldege ıe boldy. Al 2023 jyly Portýgalııada jalaýy jelbiregen Gran-prı serııasyndaǵy týrnırde jeńimpaz atanǵan edi. Mine, dzıýdoshy arý Parıj Olımpıadasyna osyndaı jetistikterimen baryp otyr. Joǵaryda aıtqan dodalarda baq synap, júlde alýdyń ózi Ábıbanyń daıyndyǵy myqty ekenin kórsetedi», deıdi B.Taıjanov.
Parıj Olımpıadasynda alǵashqylardyń qatarynda baq synaıtyn Ábıba Ábýjaqynova 48 kg salmaqta kúresedi. Bul – dzıýdodaǵy eń jeńil salmaq.
«Sporttyń qaı túrinde de jeńil salmaqta qarsylastar az bolmaıdy. Al Ábıbanyń salmaǵyndaǵy qarsylastary osal emes. Onyń ústine Olımpıadaǵa kileń myqtylar irikteledi ǵoı. Biraq bizdiń balýanymyz qarsylastarynyń aıla-tásilin, daıyndyq deńgeıin biledi. Jattyqtyrýshysy M.Esmaǵambetovpen birge burynnan kúresip júrgen Brazılııa, Qytaı, Japonııa elderindegi qarsylastarynyń osal tusyn tabý jolyn zerttedi. Máselen, Bishkektegi Azııa chempıonatynyń aqtyq synynda qytaılyq Lı Iаnannan utylǵan edi. Astanada ótken osyndaı chempıonatta japon balýany Vakana Kogaǵa ese jiberip aldy. Japon sportshysy solaqaı balýanmen kúresse, abdyrap qalatynyn eskeredi dep oılaımyn. О́ıtkeni Ábıba ózi de solaqaı», dedi belgili bapker.
Al Esmıgýl Kýıýlova tórtjyldyq dodada 63 kıloda synǵa túskeli otyr. Onyń daıyndyǵy qalaı?
«Esmıgýl de – talaby taýdaı, izdenetin dzıýdoshymyz. Onyń esimi tek elimizge ǵana emes, alys-jaqyn elderge de tanymal. Byltyr Azııa oıyndarynyń, bıyl Azııa chempıonatynyń qola júldegeri atandy. Ras, Ábıbaǵa qaraǵanda halyqaralyq dodadan alǵan júldesi az bolýy múmkin. Alaıda sheberligi shyńdalyp keledi. Osy kezge deıin 63 kelide baq synaıtyn Esmıgýl komandalyq saıystyń lısenzııasyna ıe bolǵan edi. Jaqynda onyń upaılary qaıta eseptelip, jekeleı synda kúresýge ruqsat berildi. Demek onyń da Olımpıadadan júlde alatyn múmkindigi bar. Tek aptyqpaı, asyqpaı, sabyrmen kúresse ǵana júldege qol jetkizerine senemin», dedi B.Taıjanov.
El úmit artyp otyrǵan dzıýdoshylarǵa jergilikti jerde barynsha qoldaý kórsetilip otyr. Jaqynda Olımpıadaǵa attanar aldynda eki sportshyny Atyraý oblysynyń ákimi Serik Shápkenov arnaıy qabyldap, sátti sapar tiledi.
«Alda úlken doda tur. О́tken jyly Azııa oıyndarynan júldemen oralǵan kezde Parıj Olımpıadasyna qatysý máselesin qozǵap, alańsyz daıyndalý úshin barlyq jaǵdaıdy jasaýǵa ýáde bergen edim. Endi sizder oblystyń ǵana emes, elimizdiń namysyn qorǵaısyzdar. Tórt jylda bir ret ótetin dodada sáttilik serik bolyp, baqtaryńyz jansyn. Jahannyń eń myqtylarymen synǵa túsý – erlikke para-par is. Sportshynyń bári chempıon bolýdy qalaıdy. Sondyqtan Olımpıadada elimizdiń atyn asqaqtatyńyzdar, biz sizderge senemiz», dedi S.Shápkenov.
Al oblystyq dzıýdo federasııasynyń tarapynan udaıy qarjylaı qoldaý kórsetýden qalys qalmady. О́ıtkeni qaı jarysqa qatyssa da, aldymen sportshylardyń daıyndyǵyna kóńil bólinedi.
«Tórt jylda bir ótetin Olımpıadanyń jóni bólek. Sol sebepten Ábıba men Esmıgýldiń halyqaralyq reıtıngte upaı beriletin jarystarǵa barýyna barynsha qoldaý kórsetýge mán berildi. Qazir Ábıba reıtıngte aldyńǵy orynda tur. Esmıgýldiń de reıtıngi kóterildi. Qazaq eli Olımpıadaǵa qatysýǵa attanǵan sportshylardyń jeńispen oralýyna úmit artyp, eń jaqsy tilegin arnap otyr. «Jaqsy sóz – jarym yrys» degendeı, eldiń úmiti aqtalyp, sportshylarymyzdyń júldesi kóbeıip, elimizdiń abyroıy asqaqtaǵanyna kýá bolaıyq», dedi B.Taıjanov.
Atyraý oblysy
