Batys Qazaqstan oblysynda sý tasqyny 27-28 naýryz kúnderi bastaldy. Oblystaǵy Terekti, Báıterek, Qaratóbe, Syrym, Bórli aýdandary jáne Oral qalasynyń saıajaı aýmaǵy sý tasqynynan zardap shekti.
Qar sýynan bólek, Reseıdiń Saratov jáne Orynbor oblystaryndaǵy sý qoımalary tarapynan sý kóp jiberildi. Nátıjesinde, Jaıyq ózenindegi sý deńgeıi artyp, ózen boıynda ornalasqan 84 eldi mekendi sý basý qaýpi týdy. Apat kezinde Batys Qazaqstan oblysynda 1 491 turǵyn úı jáne 10 500 saıajaı telimi sý astynda qaldy. 2 myńnan asa mal shyǵyny boldy.
Tabıǵı apattyń alǵashqy kúnderinen-aq Memleket basshysy halyqty jigerlendirip, eldiń búkil resýrsyn jumyldyrdy. Sonyń ishinde Aqjaıyq óńirin tabıǵat apatynan qutqarýǵa Qazaqstannyń 14 oblysynan áskerıler, qutqarýshylar, eriktiler, qarapaıym turǵyndar keldi. Sóıtip aýqymdy shyǵynǵa jol bermedi.
Sáýir aıynyń basynda Memleket basshysy Qasym-Jomart Toqaev sý tasqyny bolǵan Qaratóbe aýdanynyń ortalyǵyna kelip, tasqynnan zardap shekken Qorjyn aýylynyń turǵyndarymen kezdesti. Prezıdent sol saparynda ár turǵyn memleket tarapynan beriletin kómekten qalys qalmaıtynyn atap ótti. Qasym-Jomart Kemelulynyń bul sózi barsha turǵynǵa jiger berdi. Odan bólek, Úkimet basshysy jáne onyń orynbasarlary tasqyn kezeńinde óńirimizge birneshe márte kelip, daıyndyq barysymen tanysty. Qajetti resýrsty jyldam tartýǵa qolushyn sozdy.
Oblystaǵy sý tasqynymen kúreske 11 myńnan asa adam jáne 2 myńǵa jýyq tehnıka tartyldy. Jaıyq ózeniniń boıynda 150 km topyraq bóget salyndy. Osynyń nátıjesinde aýyldarǵa sý kirmedi. Jumylǵan jurt Jaıyq ózeni boıynda ornalasqan Oral qalasy men oblystaǵy 84 eldi mekendi sý basýdan aman alyp qaldy. 13 myńnan asa adam qaýipsiz jerge kóshirildi.
Tasqyn kezinde oblysta shyǵyn bolǵan 2 myńnan asa mal shyǵyny jergilikti bıýdjet jáne demeýshiler esebinen tolyq óteldi. Sonyń ishinde 1 171 bas mal – jergilikti qazynadan bólingen 151 mln teńgeniń esebinen qalpyna kelse, 1 286 bas maldyń ornyn demeýshiler toltyrdy. 9 994 otbasy 100 aılyq esep kórsetkish mólsherinde birjolǵy áleýmettik kómekti aldy. Buǵan 3,7 mlrd teńge jumsaldy. Tasqyn kezinde búlingen materıaldyq múlikti óteý boıynsha búginge deıin 10 222 otbasynyń ótinishine oń sheshim shyǵarylyp, 3,7 mlrd teńge qarjy tólendi.
Sý tasqynynan keıin arnaıy komıssııa zardap shekken 1 383 úıdi «qaıta jóndeýge jaramdy» degen qorytyndy shyǵardy. Sonyń ishinde 1 209 úıdiń jóndeý qarjysy tólendi. Tabıǵat apaty kezinde Qaratóbe aýdanynda – 116, Syrym aýdanynda – 243, Bórlide – 218, Terekti aýdanynda – 649, Báıterekte – 62, Tasqalada – 6, Oral qalasynda 17 úıge sý kirgen eken.
Osynyń ishinde sý tasqyny saldarynan tolyq búlingen Qorjyn aýylyna (Qaratóbe aýdany) Qazaqstan Premer-mınıstri Oljas Bektenov shildeniń 23-i kúni arnaıy barǵan edi. Munda qıraǵan úılerdiń ornyna bir páterli 90 úı salynyp jatyr. Qazirdiń ózinde 34 úıdiń qabyrǵasy turǵyzylyp, 56 úıdiń tóbesi jabylyp jatyr. Nysandardyń jalpy daıyndyǵy 50%-ǵa jetedi. Úkimet basshysynyń tapsyrmasy boıynsha, ýchaskede jumys isteıtinderdiń sany 30%-ǵa artty. Qazir munda 288 adam jumys isteıdi. Jumys kestege sáıkes júrip jatyr.
Buǵan qosa Terekti aýdany Podstepnoe aýylynda 3 bólmeli 106 turǵyn úı salynyp jatyr. 43 úıdiń qabyrǵasy kóterilip, 62 úıdiń shatyry jabylǵan. Bul nysandar tamyz aıynyń ortasynda paıdalanýǵa berilýge tıis. Oral qalasynyń irgesindegi Derkól kentinde 103 turǵyn úı jańa orynda salynyp jatyr. Úılerdiń irgetasy tolyq daıyn, 24 nysanda ishki árleý júrgizilip jatyr. Jumys qyrkúıek aıynda aıaqtalady dep josparlanǵan. Oral qalasynyń «Juldyz» shaǵyn aýdanynda 191 úı qurylysy bastaldy. 17 merdiger mekeme barlyq úıdiń irgetasyn quıyp, qazir 178 úıdiń qabyrǵasyn qalaýǵa kirisken. 49 nysannyń shatyry jabylyp jatyr. Jalpy alǵanda, Batys Qazaqstan oblysynda qazir 775 turǵyn úı jańadan salynady. Oblys ákimi Narıman Tóreǵalıev bul úılerdiń qurylysy qyrkúıek aıyna deıin aıaqtalyp, ıelerine beriletinin aıtty.
Sonymen qatar sý tasqynynan baspanasy jaramsyz bolǵan otbasylarǵa turǵyn úı satyp alý jumysy da júrip jatyr. Jospar boıynsha 2 248 úı satyp alý kerek. Máselen, qazirge deıin Bórli aýdanynda – 66 úı, Terekti aýdanynda – 5 úı, Báıterek aýdanynda 2 úı satyp alyndy. Oral qalasynda jalǵyz baspanasy apatty dep tanylǵan saıajaı turǵyndaryna jańa úı satyp alý jáne salý boıynsha jumys qyzý júrip jatyr. Qazirdiń ózinde oraldyq saıajaı turǵyndary úshin demeýshiler qarjysynan 864 turǵynǵa úı satyp alý jóninde sheshim shyqty. Búginde olar jańa páterine kirip, qonys toıyn toılap jatyr. Bul úıler jańa naryqtan da, ekinshi naryqtan alynyp jatyr. Oblys ákiminiń baspasóz qyzmeti óńirde sý tasqynynan zardap shekkender úshin 938 úıdi satyp alýǵa kelisimshart jasalǵanyn habarlady.
Batys Qazaqstan oblysy
