Mazmundy is-sharanyń maqsaty – «О́rken» bilim berý grantyna úmitkerler arasynda rezervtik tizimde turǵan aýyl mektebinde oqıtyn, sonyń ishinde áleýmettik jaǵynan az qamtylǵan otbasydan shyqqan 7-synyptyń bir oqýshysyna NIS túlekteri atynan Zııatkerlik mektepte oqýǵa qajetti qarajat jınaý. Byltyr Túrkistan oblysy Sháýildir aýlynyń oqýshysyna dál osyndaı grant berilip, onyń oqý aqysyn tolyq tóleý úshin eki qaıyrymdylyq baly ótken edi. Bıyl bul oqýshy Shymkent qalasyndaǵy hımııa-bıologııa baǵytyndaǵy Zııatkerlik mekteptiń oqý jylyn úzdik bitirdi.
Qaıyrymdylyq balda sóz alǵan «Nazarbaev Zııatkerlik mektepteri» derbes bilim berý uıymynyń basqarma tóraǵasy Ánýar Janǵozın is-sharanyń mańyzyna toqtalyp, oǵan kelip qatysqan túlekterge rızashylyǵyn bildirdi.
– «Alumni NIS» qaýymdastyǵy – bizdiń úlken baılyǵymyz. Biz tájirıbe almasyp, bir-birimizdi qoldaý arqyly bıik beleske qol jetkize alamyz. Biz – úlken otbasymyz, sondyqtan bizdiń kúshimiz birlikte ekenin esten shyǵarmaıyq. Álemdi izgilik, meıirimdilik, qaıyrymdylyq arqyly jaqsy jaqqa ózgertýge bolady. Búgingi bal tek qaıyrymdy is jasaý ǵana emes, sonymen birge tamasha kezdesý alańy der edim. Osy zalǵa túrli salanyń ókili jınaldy. Sondyqtan bul is-shara bárimizge jyly shýaǵyn tógip, jańa múmkindik syılaıtynyna senemin. Shyn máninde, Zııatkerlik mektepter sizderge kóp múmkindik berdi. Sapaly bilim men adamı asyl qundylyqty boılaryńyzǵa sińirdi. Endi bilim alǵan mektepterińizdi, oqýshylardy jan-jaqty qoldaıtyn ýaqyt keldi, – dedi uıymnyń basqarma tóraǵasy.
Is-shara barysynda Nazarbaev Zııatkerlik mektepteri men «SmarTestPrep» kompanııasy arasynda ózara yntymaqtastyq týraly memorandýmǵa qol qoıyldy. Ekijaqty kelisim Zııatkerlik mektep oqýshylary úshin jańa múmkindik beredi. Aldaǵy ýaqytta júlde qory 3 mıllıon teńge bolatyn baıqaý ótkizilmek. Sonymen birge oqýshylarǵa emtıhanǵa daıyndalý úshin shaǵyn kýrstan (IELTS/SAT/NUET) ótý, shetelde oqý jáne t.b. qyzmet túri tegin usynylady.
Qaıyrymdylyq balǵa Birikken Ulttar Uıymy, Parlament Senaty, Ulttyq bank, «Astana» Halyqaralyq qarjy ortalyǵy, KPMG, «Ernst & Young», «Deloitte», «Binance», «Alstom», «Dyson», «PricewaterhouseCoopers», «Kaspi.kz», «Beeline» jáne basqa da jetekshi otandyq jáne halyqaralyq uıymdar men kompanııalarda qyzmet etetin, sondaı-aq «Ivy League» men QS reıtıngindegi úzdik joǵary oqý oryndarynda oqıtyn túlekter qatysty.
Olardyń arasynda Almaty qalasyndaǵy fızıka-matematıka baǵytyndaǵy Zııatkerlik mekteptiń túlegi Adelına Lýsenko da bar. Búginde ol Azamattyq avıasııa akademııasynyń ushqysh-nusqaýshysy bolyp jumys isteıdi. Bıyl kóktemde Adelına nusqaýshy jáne stýdent qyzdardan quralǵan oqý ushaǵyn áýege kóterdi. Bul oqý tájirıbesi tarıhynda alǵash ret boldy.
– Qaıyrymdylyq baly – tek dostarymyzben kezdesý ǵana emes, túlekter qaýymdastyǵynyń bastamasyn qoldaýǵa baǵyttalǵan erekshe is-shara. Men NIS-te sapaly bilim aldym. Sondyqtan bul bilim oshaǵy oqýǵa yntaly, biraq qarjylyq qoldaýdy qajet etetin balalarǵa qoljetimdi bolǵanyn qalaımyn. Bizdiń árqaısymyz óskeleń urpaqtyń damýyna óz úlesimizdi qosýǵa tıispiz. Men osyndaı mańyzdy istiń basy-qasynda bolǵanymdy maqtan etemin, – dedi ol.
