Aıtsa, aıtqandaı-aq jedel shtab bar, shyǵyndy esepteıtin komıssııa bar bári kóp sozbaı iske kirisip ketti. Keıbir aımaqtar tasqyndy aýyzdyqtaýmen alysyp jatsa, birli-ekili oblystar shyǵyndy ótep, barar jer, basar taýy qalmaǵan qaýymǵa úı bere bastady. Prezıdent apat aımaǵynda qalǵan qaýymǵa qarjylyq jáne basqa da kómek kórsetilip, materıaldyq shyǵyndar tolyq óteletinin birden aıtty. Shyǵyndarǵa toqtalar bolsaq, 26 shildedegi jaǵdaı boıynsha elde apat saldarynan 19 360 turǵyn úı, onyń ishinde jalǵyz turǵyn úı dep tanylǵan 7 386 saıajaı zardap shekken. Barlyq nysan boıynsha tehnıkalyq tekserý nátıjeleri bar. 1 521 nysan boıynsha teris sheshim qabyldanypty. Keltirilgen zalaldy óteý úshin turǵyn úımen qamtamasyz etý jónindegi komıssııanyń sheshimimen jańa 2 577 turǵyn úı qurylysy aıaqtalady. Sondaı-aq jyljymaıtyn múlik naryǵynan 6 067 turǵyn úı satyp alynsa, 9 195 nysan jóndeýden ótedi.
Sonymen, sý tasqynynan zardap shekkenderdi turǵyn úımen qamtamasyz etý maqsatynda óńirdegi ákimdikter 2 577 úıdiń qurylysyn bastaǵan. Onyń ishinde 322 úıdiń qurylysy aıaqtalyp, oǵan zardap shekken azamattar qonystanǵan (Aqtóbe – 25 úı, Qostanaı – 57 úı, SQO – 235 úı, Pavlodar – 5 úı). Osyǵan qosa tasqynda qalǵan turǵyndarǵa 4 434 turǵyn úı satyp alynyp, 8 470 úı jóndeýden ótken.
Prezıdent aıtqandaı, tasqynnyń saldaryn joıýǵa Úkimet bar kúshin salyp otyr. Muny biz sý basqan ólkelerdegi jumys qarqynyna qarap anyq ańǵaramyz. Tipti aldyn ala josparlanǵan birneshe aýqymdy, halyqaralyq is-sharalar biri keıinge shegerilip, qarjysy únemdeldi. Jyl sońyna deıin komıssııa naqtylaǵan shyǵyndardyń barlyǵy retteletinine, bul synaqty da bir bolyp eńseretinimizge úkimet pen halyq senip otyr.
