Jambyl onkologııa jáne hırýrgııa kópbeıindi ortalyǵynyń torakoabdomınaldyq hırýrgııa bólimshesiniń meńgerýshisi, emdeýshi dáriger Erasyl Arapovtyń aıtýynsha, áıel stasıonarǵa qaıtymsyz prosestiń bastalý deńgeıinde túsken.
«Isik búkil baýyrdyń 70%-yn alyp, ót qabymen jáne jalpy baýyr arterııasymen tyǵyz baılanysta boldy, al asa úlken isiktiń salmaǵy 6 kg boldy. Ol qýys venany, tútiktermen ót qabyn jáne baýyrdyń úlken tamyrlaryn, onyń oń jaq bóligin tolyǵymen jaýyp, qysyp tastaǵan», - delingen habarlamada.
Maman atap ótkendeı, mundaı asa úlken isikti tolyǵymen alyp tastaý kerek, onyń tutastyǵyn buzbaýǵa tyrysý kerek, áıtpese qaıtalaný qaýpi óte joǵary. Bul isiktiń úlken mólsherine, ish qýysynda jumys keńistiginiń bolmaýyna, úlken tamyrlarǵa jaqyn ornalasýyna jáne anatomııanyń aıtarlyqtaı buzylýyna baılanysty ońaı emes. Kez-kelgen abaısyz qozǵalys jappaı qan ketýge jáne tótenshe jaǵdaıǵa ákelýi múmkin.
Hırýrgtar pasıent G-nyń baýyrynyń barlyq oń jaq bóligin, ót qabyn alyp tastady, kireberis vena men jalpy baýyr arterııasynyń lımfa túıinderin rezeksııalady. Qosymsha qıyndyq tómengi qýys venany jáne jalpy ót jolyn aqyryndap oqshaýlaý qajettiligi boldy.
«Anestezıologtar tobynyń joǵary deńgeıli jáne úılesimdi jumysy bizdiń pasıenttiń qanaınalym problemalaryn boldyrmaýǵa kómektesti. Denedegi kez kelgen ózgeristerge ǵana nazar aýdarý, onkologqa ýaqtyly júginý jáne durys josparlanǵan emdeý pasıenttiń ómirin saqtap, operasııa jasaý qaýpin birneshe ese azaıtady», - dep túıindeıdi Erasyl Arapov.
Onkologtar obyrdyń erte satysynda baıqalmaıtynyn eskertedi, al aǵzadaǵy kez-kelgen ózgeristerge muqııat qaraý kerek, osylaısha ózińizdi kúrdeli, qaýipti emdeýden jáne jaqyndaryńyzdy mazasyzdanýdan qutqarady.
