Dáýletti qalaǵa sáýleti ár bermeıtin ári turýǵa da jaramsyz bul úıler aldaǵy eki-úsh jylda tolyqtaı syrylatyn boldy. О́ıtkeni oblys ortalyǵynda renovasııa jobasy bastaldy.
– Negizi qalada turýǵa jaramsyz úılerdiń turǵyndaryn basqa jaılarǵa kóshirý 2021 jyly bastalǵan edi. Sol jyly 267 páterge baǵalaý júrgizilip, turǵyndarǵa ótemaqy tóleý kózdeldi. Bul maqsatqa bıýdjetten 1,5 mlrd teńge qarastyryldy. Nátıjesinde, 144 úıdiń turǵyndary jalpy somasy 970 mln teńgeni quraıtyn tıisti ótemaqylaryn aldy. Al qalǵan 116 úıge ótemaqy berilmedi. Nege? О́ıtkeni keıbir páterlerdiń muragerlik máselesi durys sheshilmegen bolyp shyqty. Keıbir páterlerdiń naqty ıesin anyqtaý múmkin bolmady. О́temaqy mólsherin azsynǵan adamdar da boldy. Byltyrdan beri qaladaǵy apatty úılerdi buzyp, olardyń turǵyndaryn basqa jaılarǵa kóshirip jatyrmyz. Qalada úı qurylysyn júrgizý aýadaı qajet. О́ıtkeni suranys joǵary, – deıdi Jezqazǵan qalasynyń ákimi Qaırat Shaıjanov.
Ol qalada bastaý alǵan renovasııa jobasyna bıýdjetten eshqandaı qarajat jumsalmaıtynyn aıtqanda sener-senbesimizdi bilmeı qaldyq. Sonda qalaı? Sóıtsek, másele bylaı eken.
Qaladaǵy renovasııa jobasyna qatysty qurylys jumystaryn júrgizýdi A.Baıdildaev basqaratyn «Samǵa» fırmasy óz moınyna aldy. Fırma burynǵy aǵash úılerdiń turǵyndaryna qazir qansha kólemdegi páterde turyp jatyr, ózi salatyn úıden naq sondaı kólemdi tegin beredi. Al eger jańa páterdegi kólem burynǵydan asyp ketetin bolsa, sol artyq kólemniń ǵana aqysyn tóleıdi. Turǵyndar mundaı usynysqa tolyq qoldaý tanytyp otyr.
Qazir «Samǵa» qalanyń Abaı kóshesiniń boıyndaǵy birneshe shaǵyn saýda núktelerin satyp alyp, sol dúńgirshekterdi syryp tastap, 48 páterlik úıdiń qurylysyna kirisip te ketti. Bul úı 2025 jyly naýryzda paıdalanýǵa beriledi. Sol kezde osy úıdiń mańaıyndaǵy «aǵash úılerdiń» turǵyndaryna jańadan salynǵan úıden páterler beriledi. Olar burynǵy páterlerin «Samǵaǵa» ótkizedi. Al fırma sol úılerdi syryp tastaıdy da, ornyna taǵy da jańa úıler salady.
– Qurylys júrgizý úshin eń keregi – jer. Bul máseleni biz qalanyń ortalyǵyndaǵy eski úılerdi syrý, buzý arqyly sheshýdi uıǵardyq. Qabyldanǵan sheshim qalaǵa da, turǵyndarǵa da, fırmaǵa da paıdaly boldy degen oıdamyz. Bul joba aldaǵy úsh jyldy qamtıdy, – deıdi Qaırat Abdollauly.
Sonymen, Jezqazǵan jańarǵaly jatyr. Joba boıynsha barlyǵy 23 úı buzylady. Bularda 184 páter bar. Olardyń barlyǵyna sol syrylǵan oryndarǵa salynatyn 48 nemese 60 páterlik 6 úıden jańa páterler beriledi. Al qalǵanyn fırma naryq baǵasymen satady.
Izdene bilse, kez kelgen tyǵyryqtan shyǵýǵa bolatyny jóninde kóp aıtylady. Jezqazǵandaǵy renovasııa jobasy – osynyń naqty kórinisi ispetti. Áıtpese kóptegen jyl boıy aıtylyp, biraq naqty sheshimi tabylmaı kele jatqan ótkir máseleniń túıinin bıýdjetke eshqandaı salmaq túsirmeı-aq tarqatýdyń jolyn taýyp, sol jobany iske asyrýǵa kirisýdi basqasha qalaı baǵalaýǵa bolady?
Jezqazǵan qalasy
