foto: Aqorda
Prezıdentke bıylǵy birinshi jartyjyldyqtaǵy Almaty qalasynyń áleýmettik-ekonomıkalyq damýynyń aldyn ala qorytyndysy týraly baıandaldy. Atalǵan kezeńde Almatyda ınvestısııalyq órkendeýdiń joǵary qarqyny baıqalady. Negizgi kapıtalǵa salynǵan ınvestısııa kólemi 15,8 paıyzǵa ósip, 714,8 mıllıard teńgege jetti. Jeke ınvestısııanyń kólemi 21,1 paıyzǵa ulǵaıdy, onyń ishinde IT-sektorda, sondaı-aq týrızm, óńdeý ónerkásibi, densaýlyq saqtaý jáne kólik salalarynda ósim bar. Jyl sońyna deıin 2 trıllıon teńge ınvestısııa tartylady dep josparlanyp otyr. 2024 jyldyń basynan beri 32,7 myń jumys orny ashyldy. Onyń 75 paıyzy turaqty jumys orny.
Qasym-Jomart Toqaevqa qoǵamdyq kólikti jańartý men ekologııalyq talaptarǵa sáıkestendirý boıynsha qabyldanyp jatqan sharalar týraly málimet berildi. Bıyl ekologııalyq taza qoǵamdyq kóliktiń úlesi 70 paıyzǵa deıin artady. Byltyr bul kórsetkish 53,7 paıyzdy quraǵan. Jergilikti bıýdjet esebinen jyl sońyna deıin gazben júretin 600 avtobýs, 100 elektrli avtobýs, 112 trolleıbýs satyp alynady. Sondaı-aq qalanyń trolleıbýs parki tolyǵymen jańartylady.
Prezıdentke qalanyń joǵarǵy bóligin sýmen qamtýdyń rezervtik shemasyn jasaý jónindegi tapsyrmasynyń oryndalýy týraly baıandaldy. Bul baǵyttaǵy qurylys jumystary bıylǵy shilde aıynda aıaqtalyp, 6 jańa uńǵyma jáne 1,5 shaqyrym magıstraldyq qubyr paıdalanýǵa berildi. Nátıjesinde qosymsha shemanyń qýaty 60 paıyzǵa artty. Bul Medeý aýdanynyń 50 myń turǵynyn sýmen úzdiksiz qamtamasyz etýge múmkindik beredi.
Erbolat Dosaevtyń aıtýynsha, áleýmettik ınfraqurylymdy damytýǵa erekshe kóńil bólinedi. Bıyl 4 medısınalyq-sanıtarlyq alǵashqy kómek ortalyǵynyń qurylysy jáne 12 emhananyń kúrdeli jóndeý jumystary aıaqtalady. Buǵan qosa, jyl sońyna deıin 11 jańa medısınalyq-sanıtarlyq alǵashqy kómek ortalyǵy men emhana qurylysynyń jobasy jasalady. Osy jyly maýsym aıynda Almaty qalasynyń Perınatologııa jáne balalar kardıohırýrgııasy ortalyǵynda «Fetaldi hırýrgııa» pılottyq jobasy júzege asty. Bul joba elimizde alǵash ret qolǵa alynyp otyr.
Memleket basshysyna mektepterdegi oryn tapshylyǵyn azaıtý baǵytynda júrgizilip jatqan jumystar jóninde aıtyldy. Jyl sońyna deıin jergilikti bıýdjet esebinen 3,7 myń oryndyq 8 nysan paıdalanýǵa beriledi. Sonymen qatar 6,4 myń oryndyq 10 jekemenshik mektep ashylady.
Prezıdent Qasym-Jomart Toqaev óńdeý ónerkásibin damytýǵa, sondaı-aq Almaty ekonomıkasyn ártaraptandyrý aıasynda shaǵyn jáne orta bıznes úlesiniń ósýi esebinen kiristi odan ári arttyrýǵa basa nazar aýdarýdy tapsyrdy.
