Bul kórme «Atameken» óner ordasynyń mádenı qundylyqtardy saqtaý, tájirıbe almasý jáne seriktestik jobalary aıasynda uıymdastyrylǵan eken. Erekshe kórmeniń ashylýyna Mádenıet salasynyń úzdigi, Sýretshiler odaǵy Mańǵystaý oblystyq fılıalynyń tóraǵasy Baqytjan Qulbaı arnaıy keldi. Meımandy Batys Qazaqstan oblysy mádenıet, tilderdi damytý jáne arhıv isi basqarmasy basshysynyń orynbasary Medhat Musauly qarsy alyp, óńirler arasyndaǵy shyǵarmashylyq baılanysty nyǵaıtqany úshin alǵyshat pen estelik syılyq tartý etti.
Kórmege mańǵystaýlyq 31 sýretshiniń 70-ten astam týyndysy qoıylǵan. Baqytjan Qulbaıdyń aıtýynsha, Mańǵystaý sýretshileri qanyq boıaý tilin sheber meńgergen. Jumystar túrli janrda jazylǵan. Olardyń ortaq taqyryby – adam taǵdyry, sonyń ishinde qazaqtyń ómiri. Bul kórme – úılesimdi álemniń, bizdi qorshaǵan ortanyń, ómirdiń sheksiz sán-saltanatynyń kórinisi, deıdi meıman.
«Atameken» óner ordasynyń dırektory Baýyrjan Halıolla mundaı sýretshiler kórmesi bolashaqta da júıeli, dástúrli túrde uıymdastyrylatynyn aıtady.
Batys Qazaqstan oblysy
