Aýyldyń árin keltirip, kóz tartatyn tamasha syılyqty arnaıy jasatyp, týǵan aýlyna syıǵa tartqan Qadyr Myrzalıev atyndaǵy mekteptiń 2004 jylǵy túlekteri bolyp shyqty. Bıyl olardyń orta mektepti bitirgenine 20 jyl tolyp jatyr. Jalpy, mektep túlekteriniń týǵan jerine osyndaı erekshe syılyq jasaýy óńirde jaqsy dástúrge aınalyp keledi.
Ulttyq oıýlarmen ári shamdarmen bezendirilgen, kúndiz de, túnde de kóz tartatyn ádemi saǵatty oraldyq sheber ári kásipker, «Daryn» sheberhanasynyń ıesi Jaras Súndetov jasaǵan eken.
– Jympıty aýlynyń 1986-1987 jyly týǵan azamattary naýryz aıyndaǵy sý tasqyny kezinde de erlikke tatıtyn eńbek kórsetti. Ásirese Ermek Kákimov, Nurhan Ámınov, Ádilbek Baıralıev, Bekjan Bısenǵalıev, Serjan Sıyqov, Farhat Tastaev, Ashat Nurmuhanov, Saılan Jubanov, Taras Sársenov sekildi azamattarǵa eldiń atynan alǵys aıtamyz. Búginde Qadyr mektebinen 20 jyl buryn túlep ushqan túlekter týǵan aýlyna tamasha syı jasap otyr. Myna tuǵyrdaǵy saǵatqa qarap, talaı adam tańdaı qaǵary anyq. Osy ıgi dástúr jalǵasa bersin! – degen Syrym aýdanynyń ákimi Jumageldi Batyrnııazov atalǵan jigitterge Alǵyshat tabys etti.
– Biz bir mektepte bes synyp bolyp qatar oqyǵan qurdastar edik. Bıyl mektebimizdi támamdap, úlken ómirge qadam basqanymyzǵa 20 jyl tolyp otyr. Osyǵan oraı týǵan jerimizge erekshe bir syılyq jasaıyq degen usynysty dostarymyzdyń kóbi qoldady. Árkim qadarı-hálinshe úles qosyp, 5 mln teńgedeı jınadyq. Osy qarjyǵa erekshe kóshe saǵatyn jasatyp, tarıhy tereń Jympıty kentiniń naq ortasynda, Ustazdar úıiniń aldyna ornatyp qoıdyq, – deıdi aýyl túlegi, kásipker Muratbek Muhambedıev.
Batys Qazaqstan oblysy
