Sporttyq mansabyn qazaq kúresinen bastaǵan Jambyl oblysy Sarysý aýdanynyń týmasy áýeli djıý-djıtsýmen aınalysyp, álem jáne Azııa chempıony atandy. Sodan Almatyda Danııar Qasqaraýov irgetasyn qalaǵan «Alash Praıd» klýbyna kelip, aralas jekpe-jekti meńgerdi. 2019 jyly Asý reseılik M-1 promoýsheniniń ýaqytsha chempıony atandy. Kelesi maýsymda Qazaqstannyń «Naıza» uıymynyń teńdessizi dep tanyldy. Sol kezde «Zúlfıkar» (Muhammed paıǵambardyń qylyshy – red.) degen janama esimdi tańdady. 2013-2024 jyldar aralyǵynda 22 ret oktagonǵa shyqqan qandasymyz 20 márte jeńis toıyn toılady. 12 qarsylasyn esinen tandyrdy. Ol tek 2017 jyly óziniń besinshi jáne altynshy jekpe-jeginde daǵystandyq Tagır Ulanbekov pen ázerbaıjandyq Mehman Mámedovten jeńildi. Sodan bergi jeti jyl aralyǵynda qarsylas shydatpady.
Aıqas alańynda atoı salǵan Asý Almabaev byltyr UFC-men kelisimshartqa otyrdy. 5 tamyzda Neshvılde tusaýkeser kezdesýin ótkizgen qazaq faıteri ıamaıkalyq Odı Osborndy qylqyndyryp tastady. Bıyl Maıamı men Enterpraızda AQSh-tyń qos sportshysy Sı-Djeı Veıgara men Hose Djonsondy jeńdi. Sodan «Zúlfıkardyń» bedeli kúrt ósti. Kúni keshe ǵana atalǵan promoýshen basshylary Almabaevty Mateýs Nıkolaýǵa qarsy shyǵarýdy jón kórdi. Bul qandasymyz úshin tamasha múmkindik. О́ıtkeni Brazılııanyń ókili reıtıngte 8-oryndy ıelenip tur. Al ózinen birshama joǵary turǵan sportshymen aıqasý kim-kimge bolsa da tıimdi. Eger ony utsań, úzdikter tiziminde joǵarylaısyń.
Asýǵa qarsy shyǵatyn faıter jaıynda ne bilemiz? Brazılııanyń shyǵysynda ornalasqan Mınas-Jeraıs provınsııasynyń ortalyǵy Belý-Orızontıdiń dúnıege kelgen 31 jastaǵy sańlaq 2010 jyldan beri aralas jekpe-jekpen shuǵyldanady. UFC-de nápaqasyn taýyp júrgenine úsh jyldan asty. Sol aralyqta 24 kezdesý ótkizip, 19 ret jeńiske jetti. 10 básekede aıqyn basymdyq tanytty. Álemniń eń beldi promoýshenindegi alty jekpe-jektiń tórteýinde mereıi ústem boldy. Sońǵy eki kezdesýinde AQSh-tyń arlandary Brendon Roıvel (reıtıngte №1) men Aleks Pereske (№6) nokaýtpen utyldy.
Qalaı bolǵanda da, Asý Almabaevtyń burynǵy qarsylastaryna qaraǵanda Mateýs Nıkolaýdyń dárejesi áldeqaıda joǵary. Keleshekte bul jaıt ta eskeriledi. 19 qazanda Las-Vegastaǵy UFC APEX arenada Asýdyń asyǵy alshysynan tússe, onda kelesi jekpe-jegin ol TOP-bestiktiń qatarynda júrgen sańlaqtardyń birine qarsy ótkizýi ábden múmkin. Osylaısha, chempıondyq táj úshin talasatyn kún de jaqyndaı túsedi. Eń bastysy, qazaqtyń qaısar uly aıqas alańynda aıanbaı aıqasyp, jeńiske jetýi úshin janyn salýy kerek.
