Byltyr úshinshi megapolıste 12 «Jaıly mekteptiń» qurylysy bastaldy. Qazir atalǵan bilim uıymdarynyń ishi árlenip, ınjenerlik jelileri tartylyp, aýlalary abattandyrylý ústinde. Bul mektepterdiń barlyǵy da bıyl qoldanysqa beriledi. Ulttyq jobanyń oryndalýyn, ıaǵnı qurylystardyń sapasyn, der kezinde paıdalanýǵa berilýin «Samruk-Kazyna Construction» AQ qadaǵalaıdy.
«Bıyl «Jaıly mektep» jobasy aıasynda Shymkentte taǵy 6 mekteptiń qurylysy bastalady. Bul bilim berý uıymdary kelesi jyldyń sońyna qaraı tapsyrylady. Jalpy, elimiz boıynsha ulttyq joba sheńberinde 2025 jyl aıaqtalǵansha 369 zamanaýı mektep salynady. Osyndaı «Jaıly mektepke» 740 myń oqýshy sııady. Osy tusta qurylysshy kompanııalar men basqa da taýar óndirýshiler arasynda baılanys ornatyp, «altyn kópir» bolyp otyrǵan «Atameken» ulttyq kásipkerler palatasynyń basshylyǵyna alǵysymdy aıtamyn. Negizinde «Samuryq-Qazyna» ulttyq ál-aýqat qory» AQ-nyń kózdegen maqsaty – jergilikti taýar óndirýshilerdi qoldaý. Alda turǵan eń mańyzdy mindettiń biri ol – «Jaıly mektep» jobasy aıasynda salynyp jatqan barlyq mektep jańa oqý jyly qarsańynda el ıgiligine tapsyrylýǵa tıis», deıdi «Samruk-Kazyna Construction» AQ Shymkent qalasy boıynsha óńirlik basshysy Marat Qýanyshbaev.
«Samruk-Kazyna Construction» AQ ókiliniń aıtýynsha, jaıly mektepter qandaı da bir sheteldik standartqa súıenip salynyp jatqan joq. Degenmen mektepterdi jobalaý barysynda sheteldik jáne otandyq ozyq bilim oshaqtarynyń tájirıbesi negizge alynǵan.
Mundaı bilim oshaqtarynyń aýdany kádimgi jalpy orta mektepterge qaraǵanda 15-20 paıyzǵa úlken bolady. Sondaı-aq tehnıkalyq jaraqtandyrýy da 4 esege kúshti. Sondyqtan «Jaıly mektepke» kompıýter, ınteraktıvti taqtalar sekildi zamanaýı qurylǵylar kóbirek paıdalanylady. Al qurylysqa barynsha otandyq qurylys materıaldary qoldanylady. Otandyq qurylys materıaldarynyń ortasha úlesi shamamen 70 paıyzdy quraıdy. Máselen, mektep qurylysyna paıdalanylatyn sement, qıyrshyq tas, odan bólek qasbetin árleıtin materıaldar men shatyr jabyndysyna deıin otandyq ónim paıdalanylady. M.Qýanyshbaevtyń aıtýyna qaraǵanda, «Jaıly mektepterge» arnalǵan jıhaz da tek qazaqstandyq taýar óndirýshilerden satyp alynady. Bul rette basymdyq jergilikti kompanııalarǵa berilip otyr.
Osylaısha, jańa tıptegi mektepterdi jabdyqtaýǵa shymkenttik taýar óndirýshiler, onyń ishinde jıhaz kompanııalary jumyldyrylǵan. Olar merdigerlermen kelisimshartqa otyryp, oqý quraldarymen qamtamasyz etip jatyr.
Sala mamandary men sarapshylar baıandaǵandaı, elimizde alǵash ret júzege asyp jatqan qanatqaqty joba qazaqstandyq kompanııalardy, jergilikti taýar óndirýshilerdi qoldaýdyń úlken tetigine aınaldy. Ulttyq jobany naǵyz strategııalyq bastama deýge bolady. Sebebi ol kásipkerlerge memlekettiń qolushyn berýge, ulttyq jobaǵa bólingen qarjynyń el ekonomıkasyna jumys isteýine úlken kómegin tıgizip otyr.
Degenmen joba aıasynda tapsyrys alyp, ony oryndaýdyń da ózindik talaby bar. Máselen, «Jaıly mektep» ulttyq jobasyna qatysý úshin taýar óndirýshilerdiń ST-KZ nemese ındýstrıaldy sertıfıkaty bolýǵa tıis. Sebebi bilim berý salasyndaǵy osy ulttyq jobaǵa sáıkes mektepterdiń barlyq ǵımaraty men jıhazy oqýshylar men ustazdar úshin yńǵaıly, qaýipsiz bolýy kerek. Sonymen qatar elimizdiń zańdary boıynsha tıimdi oqytý úderisin uıymdastyrý úshin bilim alýshylar men pedagogterdiń oqý-tárbıe qajettilikterine sáıkes kelýi qajet. Shymkent qalalyq kásipkerler palatasynyń dırektory Sabıra Adambekovanyń málimdeýinshe, elimizdegi barlyq mektep báskege qabiletti naǵyz sapaly taýar shyǵaratyn otandyq óndirýshilerdiń qural-jabdyqtarymen jaraqtandyrylǵany abzal. Bul eksportqa baǵdarlanǵan óndiristi qoldaýdyń tıimdi tásili ǵana bolyp qoımaıdy, sonymen birge Qazaqstannyń taýaryna degen senimdilikti kúsheıtip, naǵyz patrıotızmniń kórinisin aıǵaqtaı túsedi.
Osy tusta jaýapty sala ókilderiniń qurylys kompanııalary men jıhaz óndirýshilerge qoıyp otyrǵan basty talaby – ol joǵaryda aıtyp ótkenimizdeı, qurylys pen oqý kabıneti jabdyqtarynyń sapaly bolýy. Bul qaǵıdany «Jaıly mektep» qurylysyna qatysýshy kásipkerlerge jaýapty sala ókilderi áldeqashan jetkizgen. Sondyqtan búginde sapa máselesin qalalyq ákimdik te, bilim basqarmasynyń mamandary da birinshi kezekke qoıyp, jiti qadaǵalaıdy. Jyl basynda Shymkent qalasynyń ákimi Ǵabıt Syzdyqbekov jıhaz jasaýshylarmen, «Jaıly mektep» jobasyn iske asyrýshylarmen arnaıy kezdesip, sapa máselesinde shıkilik shyqpaý kerektigi jóninde qadap aıtqan edi.
Osy oraıda Shymkent qalasy ákimdigi apparatynyń basshysy Erjan Seıtenovtiń qatysýymen birneshe jıyn ótip, «Jaıly mektep» jobasynyń merdiger kompanııalary men jıhaz óndirýshileri onda bas qosyp, túıtkildi máselelerdi talqylady. О́z kezeginde Shymkent qalalyq bilim basqarmasynyń ókilderi mektep jıhazdaryna qoıylatyn talaptardy, olardyń standarttan aýytqymaýy týraly jıhaz óndirýshilerge aldyn ala habardar etken.
«Shymkent qalasynyń ákimi ulttyq jobany júzege asyrýǵa qatysty tıisti tapsyrma berdi. Mektep salýshy merdiger kompanııalar men jıhaz sehtary arasynda kelisimshart jasaldy. Jalpy, «Jaıly mektep» jobasy aıasynda salynatyn mektepterdi jabdyqtaýda qoıylatyn talap – bilim oshaqtaryn jańa oqý jylyna deıin qajetti oqý jıhaz-jabdyqtarmen der kezinde qatamasyz etý. Mektep kabınetin tıisti standart pen normaǵa saı jıhazdarmen qamtamasyz etý boıynsha bilim basqarmasy sol kezdegi Bilim jáne ǵylym mınıstriniń 2016 jylǵy 22 qańtardaǵy «Mektepke deıingi, orta bilim berý uıymdaryn, sondaı-aq arnaıy bilim berý uıymdaryn jabdyqtarmen jáne jıhazben jaraqtandyrý normalaryn bekitý týraly» №70 buıryǵyna súıenip, osy erejeni negizge alady. Máselen, osy buıryqtaǵy talaptyń bir pýnktin alsaq, oqý jıhazdary negizinen ashyq tústi bolýy kerek. Sondyqtan basqarma mınıstrliktiń jıhazǵa qatysty qaǵıda-erejelerin «Samuryq-Qazyna» AQ-ǵa, qurylys kompanııalaryna arnaıy hatpen joldaǵan», dedi qalalyq bilim basqarmasy bóliminiń basshysy Turar Saýtov.
Osylaısha, ulttyq joba otandyq kásipkerler úshin, onyń ishinde taýar óndirýshilerge jaqsy múmkindik týdyryp otyr. Qolda bar sońǵy málimetke súıensek, «Jaıly mektep» ulttyq jobasy aıasynda Shymkentte salynyp jatqan 12 mektep qurylysynyń bas merdigerleri jergilikti 5 jıhaz kompanııasymen kelisimshartqa otyrǵan. О́z kezeginde jıhaz óndirýshiler alǵan bul tapsyrystyń birazyn taǵy da jergilikti 4 jıhaz óndirýshige bólip bergen.
ShYMKENT
