ALMATY. 26 sáýir. Qala aýmaǵynda jańadan ashylǵan «Alataý» aýdanynyń turǵyny 100 jastaǵy keıýana Mámılııa Álimbaevanyń «Shańyraq» shaǵyn aýdanyndaǵy №26 mektep zalyna, №20 saılaý ýchaskesine óz aıaǵymen kirip kelýiniń ózi saılaýǵa qatysýshylardy bir serpiltip tastady. Bul týraly egemen.kz habarlady.
Sol jerdegi top 100 jasaǵan anamen sýretke túsip, estelik úshin ana batasyn aldy. Mámılııa Álimbaeva apamyz óziniń azamattyq paryzy – daýys berý quqyǵyn oryndaı otyryp, saılaý ýchaskesindegi jamaǵatqa óz basynan keshirgen ǵumyrlyq shejiresinen habar berip, barsha qaýymǵa, búgingi saılaýǵa túsip jatqan azamatardyń barshasyna tilek tilep, bata berdi.
Sosıalıstik Eńbek Eri, 7 bala, 25 nemere, 16 shóbere, 7 shópshektiń uly anasy Mámılııa apa Qazaqstan memleketiniń búgingi shyqqan belesi men baǵyndyrǵan bıikterine úlken qýanyshyn bildire otyryp, alda Qazaq eliniń asar asýy men jeter jeńisiniń moldyǵyna bek senimdi ekenin málimdedi.
Qanat Eskendir.
Derek, sýret: egemen.kz
