Kúlásh Qunantaıqyzy 1931 jylǵy 4 naýryzda Shyǵys Qazaqstan oblysynyń Ulan aýdanynda dúnıege kelgen. 1952 jyly Qazaq memlekettik qyzdar pedagogıkalyq ınstıtýtynyń Fılologııa fakýltetin bitirgen. Qazaqstan áıelderiniń arasynan shyqqan tuńǵysh pedagogıka ǵylymdarynyń doktory. 1966 jyly «Nekotorye vneýchebnye trýdovye ı obrazovatelnye obedınenııa ýchashıhsıa Kazahstana» taqyrybynda kandıdattyq jáne 1981 jyly «Razvıtıe jenskogo obrazovanııa v Kazahstane (1920-1975)» taqyrybynda doktorlyq dıssertasııasyn qorǵaǵan.
Aıta keteıik, Kúlásh Qunantaıqyzy 1968-1984 jyldary Qazaq memlekettik qyzdar pedagogıkalyq ınstıtýtyn eń uzaq ýaqyt basqarǵan bilikti rektor. 16 jyl aralyǵynda oqý ornyn jańa deńgeıge kótergen. Sondaı-aq sol kezeńde zaman talabyna saı oqý ǵımarattary men úsh jataqhana salynyp, paıdalanýǵa berilgen.
Sonymen qatar 1200 adamdy bir mezgilde tamaqtandyratyn ashana, kitaphana men sport keshenderi iske qosylǵan. Kúlásh Qunantaıqyzynyń tikeleı yqpalymen 80 páterlik turǵyn úı salynyp, baspanasyz júrgen ınstıtýt qyzmetkerleri men muǵalimderine berilgen. Jańadan 12 zerthana ashylyp, sondaı-aq stýdentter kontıngenti 3600-dan 6200-ge jetti, fakýltetter sany 4-ten 6-ǵa, kafedralar sany 19-dan 28-ge artqan.
Otandyq pedagogıka ǵylymynyń damýyna súbeli úles qosqan kórnekti ǵalym, ulaǵatty ustaz Kúlásh Qunantaıqyzy – elimizdiń joǵary bilim berý salasynyń damýynda óz qoltańbasyn qalyptastyrǵan qaıratker.
