Atap aıtsaq, Máskeý qalalyq Dýmasynyń tóraǵasy Alekseı Shaposhnıkovpen júzdesýde Astana qalasy máslıhatynyń tóraǵasy Erlan Kanalımov jas elordamyzdyń tarıhy táýelsiz eldiń jańa tarıhynan ajyraǵysyz ekenin aıta kele, osy jyldar ishinde elimizdiń barlyq óńirinen júzdegen myń adam elordamyzdy salýǵa jáne jańǵyrtýǵa eleýli úles qosqanyn atap ótti. Astana máslıhatynyń qurylymy, onyń maqsattary men mindetteri, elordanyń qalaı damyp jatqany týraly da baıandady.
«Astana men Máskeý arasynda jaqsy yntymaqtastyq tájirıbe qalyptasty. Biz qala qurylysy, mádenı murany saqtaý, kreatıvti ındýstrııany damytý salasynda ózara is-qımyl jasaımyz», dedi Erlan Kanalımov.
Sondaı-aq shyǵarmashylyq ındýstrııany damytýǵa arnalǵan dóńgelek ústel otyrysynda Astana máslıhatynyń tóraǵasy Erlan Kanalımov Memleket basshysy Qasym-Jomart Toqaev osy salany aýqymdy damytý úshin barlyq jaǵdaıdy jasaýdy tapsyrǵanyn atap ótti. Máskeý úkimetiniń mınıstri Sergeı Cheremın qatysqan jıynda Reseı astanasy osy salada kósh bastap turǵany, Astananyń Máskeýden bul tarapta úıreneri bary tilge tıek etildi.
«Astana – elorda retinde búginde osy salany damytý boıynsha eldegi kóshbasshylardyń biri. Shyǵarmashylyq ındýstrııa ınfraqurylymynyń tizbesine konserttik qyzmetti damytý, kórmeler ótkizý, murajaı jáne teatr qyzmeti, sondaı-aq sırk óneri jáne IT damytý salalaryndaǵy 26 nysan kiredi», dedi Astana máslıhatynyń tóraǵasy.
«Qyz Jibek» operasyndaǵy «Shashý» jarqyn bıimen ashylǵan Máskeý Halyqaralyq mýzyka úıiniń sahnasynda ótken gala-konsertte Qazaqstannyń halyq ártisteri Roza Rymbaeva, Nurjamal Úsenbaeva, Qazaqstannyń eńbek sińirgen qaıratkeri Súndet Baıǵojın, E.Rahmadıev atyndaǵy Memlekettik akademııalyq fılarmonııanyń «Saryarqa» folklorlyq ansambli men kameralyq hory, «Turan» etno-folklorlyq ansambli, «Terra» bı teatry, halyqaralyq baıqaýlardyń laýreattary Erjan Toqsabanov, Raıymbek Tarıhov, Meıram Aıtmaǵambetov, Mıhaıl Kandaýrov, Nazym Saǵyntaı óner kórsetti. Balet ártisteri Baqtııar Adamjan jáne Áıgerim Beketaeva, «Úlken opera-2023» telejobasynyń jeńimpazy Dinmuhamed Kóshkinbaev, «Novaıa volna-2014» balalar baıqaýynyń júldegeri Muhammedálı Júginisov, «Junior Eurovision-2020» halyqaralyq baıqaýynyń júldegeri Qaraqat Bashanova, vırtýoz-pıanıst Temirlan Beısenbaı ónerlerimen máskeýlik ónersúıer jandardy tánti etti.
Saltanatty jıynda sóz alǵan Máskeý úkimetiniń mınıstri Sergeı Cheremın Astana mádenıet kúnderiniń Máskeý festıvaldary men halyqaralyq merekeler tizbegindegi mańyzdy oqıǵa ekenin jáne eki el arasyndaǵy dostyqty aıqyndaıtynyn aıtty.
Al Qazaqstannyń Reseıdegi elshisi Dáýren Abaev eki eldiń mádenıet kúnderin ótkizý ózara rýhanı baılanysty nyǵaıtyp, dostyq pen odaqtastyqty kúsheıtetin mańyzdy dástúr ekenin atap ótti. Onyń aıtýynsha, bul – mádenı dıplomatııalyq kópir salýdyń eń tıimdi joly.
Astana qalasynyń delegasııasy Máskeý qalasyna resmı sapary aıasynda halqymyzdyń birtýar perzentteri, ulttyq múdde jolynda aıanbaı eńbek etken Álıhan Bókeıhan men Júsipbek Aımaýytulynyń basyna baryp, zııarat etti.
«HH ǵasyr basynda Álıhan atamyz bastaǵan qazaq zııalylary ulttyq múdde jolynda aıanbaı eńbek etip, memleketshildiktiń ozyq úlgisin kórsetti. Ol aǵartý isinen bastap el, ult taǵdyryna qatysty máselelerdiń bárimen aınalysty. Talantty shyǵarmalar qalyptastyrdy, tarıh pen etnologııa salasynda aıtýly týyndylaryn jazdy, qazaq ulttyq baspasóziniń dástúrin túzdi, ádebıet salasynda eleýli iz qaldyrdy. Júsipbek Aımaýytuly – shyn máninde, qazaqqa berilgen, ulty úshin janyn qıǵan, ýaqyt ótken saıyn bıikteı túsetin birtýar tulǵa. Júsipbek atamyz – kórnekti jazýshy ǵana emes, sol eńbekterimen halyq azattyǵyn muń etken, eliniń erteńin oılap, eńiregen ultynyń bolashaǵyn oılap emirengen azamat. Alash ustanymy – ult muraty. Qazaqtyń mańdaıyna bitken arda azamattardyń erligin ardaqtap, jastardyń boıyna sińirý – azamat retinde mindetimiz dep sanaımyn», dedi Erlan Ermekuly.
Jalpy, birlesken ekonomıkalyq jáne saıası jobalar ortaq múddelerdi jaqyndastyrsa, mádenıet izgilik pen sulýlyqqa umtylǵan jandardy úndestiretini sózsiz. Máskeýde ótken Astana mádenıetiniń kúnderi de osy bir ultaralyq rýhanı jaqyndyqty aıqyndaı túsetindeı.
