- Sporttyq gımnastıkadan ótken jarysta Sımona Baılz úsh ret altynnan alqa taǵyp, AQSh quramasynyń jalpy komandalyq esepte kósh bastaýyna súbeli úles qosty. 27 jastaǵy Ogaıo shtatynyń týmasy qoldy tirep jasaıtyn jattyǵýda, kópsaıysty jáne komandalyq básekede aldyna jan salmady. Oǵan deıin ol 2016 jylǵy Rıo Olımpıadasynda tórt ret jeńis tuǵyrynyń eń bıik satysyna kóterilgen. Osylaısha, bas júlde sanyn altyǵa jetkizgen Baılz áıelderdiń sporttyq gımnastıka tarıhynda oljaǵa molynan kenelgender arasynda úshinshi orynǵa kóterildi. Onyń aldynda – tek kelmeske ketken qos memleket KSRO men Chehoslovakııa qurama komandalarynyń músheleri Larısa Latynına (9 altyn+5 kúmis+4 qola) men Vera Chaslavska (7+4+0). Amerıkalyq arýdyń alty altynynan bólek, taǵy bir kúmis pen eki qolasy bar.
- Olımpııa oıyndarynda 28 (23+3+2) júlde alyp, adam nanǵysyz kórsetkishke qol jetkizgen AQSh-tyń ataqty júzýshisi Maıkl Felps dopıngpen ustalǵandardy birden ómir boıy úlken sporttan shettetý qajet dep esepteıdi. «Men árbir jarysty utqan saıyn mysyqtileý adamdar tabylatyn. Olar meni «Ruqsat etilmegen dári-dármekter paıdalandy, aramza áreketterge bardy. Áıtpegende mynadaı kórsetkishke qoly jetpeıtin edi» dep aıyptady. Alaıda men esh ýaqytta alaıaqtyq jasaǵan emespin. Jeńiske óz eńbegim arqyly ǵana jettim. Ony quzyrly organdarǵa san márte dáleldedim. Sol sebepti de men «dopıng daýyna» ilikken aramzalarǵa asa qatań jaza qoldanylǵanyn qalaımyn», dedi.
- Dzıýdodan Olımpıadanyń eki jáne álemniń bes dúrkin chempıony Davıd Dýıe Fransııa sportshylaryna beriletin syıaqydan salyq ustaýǵa úzildi-kesildi qarsy ekenin málimdedi. «Bizdiń elde chempıondar 80 000, kúmis pen qola júldegerler 40 000 jáne 20 000 eýro alady. Bireýler bul somany asa bir qomaqty qarjy dep eseptemese, endi bireýler úshin zor baılyq. Oǵan sportshylar qaýymy uzaq jyl boıy tókken teri arqyly qol jetkizedi. Sondyqtan da taza eńbekpen kelgen aqshadan salyq ustaý – naǵyz opasyzdyq, uıat nárse», deıdi fransýzdyń ataqty balýany.
- Izraıl sportshysy Anastasııa Gorbenko Halyqaralyq Olımpıada komıteti (HOK) uıymdastyrǵan banketke baramyn dep jarystan qalyp qoıdy. Negizi ol 200 metrge keshendi júzýshiler saıysynyń fınalyna óte almaǵan edi. Sodan HOK-tyń keshki asynda tamaqqa sylqııa toıyp alady. Bir mezette Anastasııanyń aldyn orap ketken aýstralııalyq Ella Remzıdiń syrqattanyp qalǵany belgili bolady. Erejege saı jasyl qurlyq ókilin odan keıin turǵan sportshy almastyrýy kerek. Ol Gorbenko edi. Bul jańalyq onyń qulaǵyna jarysqa 25 mınýt qalǵanda ǵana jetedi. Biraq sol ýaqyt aralyǵynda «Parı-La-Defans» arenasyna jetýi múmkin emes-ti. Sóıtip, fınaldyq saıys Izraıldiń ókilinsiz ótedi. Kim bilsin, eger Anastasııa asqa barmaǵanda jeńis tuǵyryna kóterilýi de múmkin edi ǵoı?
- Asa aýyr salmaqta aıqasyp, jeńilistiń kermek dámin tatyp kórmegen kásipqoı bokstyń kókjaly Aleksandr Ýsık Parıjde jeńis tuǵyryna kóterilgen Ýkraınanyń bylǵary qolǵap sheberlerine óz qaltasynan syıaqy taǵaıyndady. Sol eldiń áıgili bapkeri Dmıtrıı Sosnovskııdiń aıtýynsha, Ýsık chempıondyq ataqqa qol jetkizgen sańlaqqa 80 000, fınalıske 70 000 jáne qola júldegerge 50 000 dollar tabystaýǵa ýáde etken kórinedi.
- Áıelder arasyndaǵy 100 metrlik saıysta sensasııalyq nátıje tirkeldi. Basty favorıtterdiń barlyǵyna shań qaptyryp ketken Jıýlen Alfred teńdessiz dep tanyldy. Tipten, AQSh-tyń qos júırigi Shakarrı Rıchardson men Melıssa Djefferson oǵan jete almady. Bul – Sent-Lıýsıı tarıhyndaǵy Olımpıadanyń alǵashqy altyn medali.
