Júldeniń aýyly alys

Eljanadan el úmitti

Kórkem gımnastıkadan synǵa túsken El­jana Tanıeva irik­teý kezeńinde 7-orynǵa turaq­tap, fı­naldyq saıysqa joldama al­dy. Endi joǵary upaı jınaǵan 10 gımnaspen medalǵa talasady. Urshyqpen óner kórsetýde Eljananyń sheberligin tóreshiler 32.300 upaımen baǵalady. Úsh snarıadtan keıin 95,150 upaı jınady.

Ulttyq olımpıadalyq komıtetke bergen suhbatynda kórkem gımnastıkadan komandanyń bas bapkeri Álııa Iýsýpova shákirti­niń alamanǵa alǵash ret qosylǵany­na qaramastan jattyǵýdy joǵa­ry sheberlikpen oryndaǵanyn jetkizdi.

«Eljana óte eńbekqor gımnast, ózi alǵash qatysqan Olımpııa oıyndarynan keremet áser alyp otyr. Nátıjesi de jaqsy dep sanaımyn, degenmen de tóreshiler urshyq jattyǵýynda tómen upaı jazǵany túsiniksiz. Al doppen jattyǵý jasaýda qolynan túsirip alyp, qatelikke boı aldyrdy. Urshyq jattyǵýyn minsiz oryndasa da upaıy az boldy. Bas bapker retinde tóreshilerge shaǵym túsirip edim, ókinishke qaraı, qanaǵattandyrmady», dedi Á.Iýsýpova.

Bas bapker tek Eljana ǵana emes, álem chempıondary, Olım­pıada júldegerleriniń ózi de jattyǵýdy oryndaý mezetinde qatelikke urynyp jatqanyn aıtty. 18 jastaǵy shákirtiniń kele­shekte joǵary jetistikke qol jetkizip, jankúıerlerin qýan­tatynyn atap ótti.

Sý sportynan da kórsetkish kóńil kónshitpeı tur. Marııa Brovkova kanoemen esýde jekeleı synda saıysty shırek fınaldan aıaqtady. Ár toptan úzdik nátıje kórsetken eki sportshy ǵana jartylaı fınalǵa joldama alatyndyqtan Brovkova óz tobynda 4-oryndy mise tutyp, júldege talasý múmkindiginen qol úzdi.

Baıdarka men kanoede esýden Tımýr Haıdarov pen Sergeı Emelıanov V tobynda saıysqa túsken. 500 metrge júzýden óz tobynda úshinshi jetkenimen, jalpy esepte 11-satyǵa turaqtady.

Sańlaq súrindi

Sporttyq quzǵa órmeleý­den Ámir Maımuratov ta jazǵy Olımpııa oıyndaryna tuńǵysh ret qatysqan. Irikteý synynda ol tipti Olımpıada rekordyn da jańartqan. Biraq shırek fı­naldyq tartysta ırandyq Reza Alıpýrmen synǵa túsip, 6,14 sekýnd qalyp qoıdy. Oǵan sebep – aıaǵynyń taıyp ketýi. Qatelikke boı aldyrǵan jerlesimiz qaı­ta umtylǵanymen ýaqytty uza­­typ aldy. Ámir Parıj jazǵy Olım­pııa oıyndarynyń jol­da­ma­syn maýsym aıynda Majarstan­nyń Býdapesht qalasynda ótken ­lı­sen­zııalyq týrnır­de oljala­ǵan edi. Sol dodanyń fı­nal­dyq tartysynda jerlesi­miz­den basym túsken qytaılyq Ý Peng Parıj jazǵy Olımpııa oıyn­­darynyń kúmis medalin ıelendi. Buıyrmaı tur eken, eger Ámir ırandyq qarsylasymen saıysta qatelikke urynbaǵanda medal úshin de tartysqa túser edi.

Sporttyq quzǵa órmeleýden Parıj jazǵy Olımpııa oıyn­darynyń altynyn Indo­nezııa sportshysy oljalasa, kúmis medal Qytaı, qola AQSh sportshysyna buıyrdy.

Qazirgi bessaıystan da kór­set­kish kóńil kónshitpeıdi. Áıelder arasynda synǵa túsken Elena Potapenko alǵashqy syn – semserlesýde 200 upaımen 27-satyny mise tutty. Jartylaı fınaldyq tartysty A tobynda ótkizip, 200 metrge sýda júzýde erkin ádispen synǵa túsedi. Odan keıin konkýrdan sheberligin baıqap, júgirý barysynda lazerli tapanshamen nysana kózdeýden baǵyn synaıdy. Qazirgi bessaıystan Parıj jazǵy Olımpııa oıyndaryna 72 sportshy qatysyp, medalǵa talasady.

О́zbek oǵlany – eki dúrkin Olımpıada chempıony

Taekvondodan Batyrhan Tó­leý­ǵalı Parıj jazǵy Olımpııa oıyn­daryn sátti bastaǵan. 80 sal­maq dárejesinde synǵa tús­ken jerlesimiz alǵashqy aına­lymda Malı eliniń úmiti Is­mael Kýlıbalıden basym tús­ti. Shırek fınalda eki dúrkin álem chempıony, osy salmaqtyń kóshbasshysy ıtalııalyq Sımone Alessıoǵa qarsy aıqasty. 18 jasynda jazǵy Olımpııa oıyndaryna qosylǵan jerlesimizdiń táji­rıbesi kemshin soqqany baı­qaldy. Batyrhan – jastar arasyn­da álem chempıonatynyń kúmis júl­desin oljalaǵan sportshy. Taek­vondodan ulttyq quramanyń aǵa bap­keri Nursultan Mamaev sport­shylardyń Olımpıada doda­syndaǵy aıqasyna pikir bildirdi.

«58 kg salmaq dárejesinde Samır­hon Ababakırov úshin Parıj jazǵy Olımpııa jarqy­raıtyn shaǵy edi. Biraq alǵashqy aınalymda Tokıo jazǵy Olım­pıadasynyń chempıony, álem chempıonatynyń jeńimpazy, Eýropa birinshiliginde top jar­ǵan ıtalııalyq Vıto Del Akıla­ǵa ese jiberdi. Samırhon da jazǵy Olımpııa oıyndaryna tuńǵysh ret qatysyp, dańqty qarsylasy­nan qaımyqpaı aıqasty. Tipti birinshi kezeńde alda turǵan, odan keıingi kezeńde jeńisti ýysynan sýsytyp aldy. Batyrhan Tóleýǵalı – elimizden barǵan sportshylardyń ishindegi eń jas sańlaq. Mundaı iri dodanyń mysy bolady, buǵan deıin qatysyp kórmegendikten de qobaljyǵan shyǵar. Biraq qarsylasynan taı­salǵan joq. Keleshekte sportshylarymyz el úmitin aqtaıdy», dedi N.Mamaev.

Biz taekvondoshylarymyz­dyń kelesheginen úmit kútemiz, árıne. Biraq biz erteńge senim­men qaraýdy mise tutqanda О́zbek­stannyń sportshysy Ulyqbek Rashıtov eki dúrkin Olımpıada chempıony atanyp úlgerdi. 2021 jyly Tokıoda ótken jazǵy Olım­pııa oıyndarynyń chempıony atanǵanda Ulyqbektiń jasy 18-de edi. Arada ótken úsh jyl ishinde ol óziniń ekpinine ekpin qosyp, kúsh-qaıratyn tolyqtyrdy. Parıj tórinde de jeńisti saparyn jal­ǵap, 68 kg salmaqtyń úzdigi atandy. О́zbekstan sportynyń tarıhynda jazǵy Olımpııa oıyndarynyń eki dúrkin chempıony degen ataq ta osy Ulyqbektiń enshisine jazylyp otyr.

Ázirge sportshylarymyz 1 al­tyn, 3 kúmis, 3 qola medal kórset­kishimen 29-satyda tur.