Sport • 10 Tamyz, 2024

Ketı Ledekın: derek pen dáıek

124 ret

kórsetildi

3 mın

oqý úshin

Búgingi tańda óner kórsetip júrgen sportshylar arasyndaǵy eń ataqtysy AQSh-tyń ókili Ketı Ledekın ekeni daýsyz. Orta jáne uzyn qashyqtyqqa júzetin 27 jastaǵy Vashıngtonnyń týmasy Parıjde 1 altyn, 1 kúmis jáne 1 qola medaldy ıelendi. Oǵan deıin ol 2012 jyly London, 2016 jyly Rıo-de-Janeıro jáne 2021 jyly Tokıodaǵy dodalarda oljaǵa keneldi. Qazirgi kezde Ketıdiń qorjynynda 9 altyn, 4 kúmis jáne 1 qolasy bar. Sóıtip, Ledekın Olımpıadada eń kóp júlde alǵan sportshylar tiziminde úshinshi orynǵa kóterildi. Onyń aldynda tek amerıkalyq júzýshi Maıkl Felps (23 altyn+3 kúmis+2 qola) pen KSRO gımnasshysy Larısa Latynına (9+5+4) orap tur.

Ǵalym SÚLEIMEN

Foto: dzen.ru

Fılıppındik gımnast Karlos Iýlo Parıj Olımpıadasynda eki jattyǵý boıynsha aldyna jan salmaı, altyn tuǵyrdan qol bulǵady. Oǵan deıin atalǵan memlekettiń birde-bir er sportshysy ǵalamdyq bas júlde almaǵan. Sol kóshti Iýlo bastady. Onyń eńbegi úkimet tarapynan joǵary baǵalanyp, syıaqy retinde 52 000 dollar kóleminde qarajat pen tolyq jabdyqtalǵan eki bólmeli páter berildi. Oǵan Sportshylardy yntalandyrý qorynan 174 360 dollar bólindi. Sonymen qatar áp-sátte Ulttyq batyrǵa aınalǵan sańlaq ómir boıy ózi qalaǵan meıramhanadan tamaqty tegin iship, dárihanalar men aýrýhanalardyń qyzmetin tegin paıdalanýǵa quqyly. Jáne de oǵan eń qymbat markaly telefondar, kólikterdiń qosymsha bólshekteri, turmysqa qajetti zattar men qural-saımandar aqysyz beriletin boldy.

Fransııalyq Leon Marshan Olımpııa oıyndary barysynda 200 metrge brass jáne batterflıaı ádisimen júzýde bas júldeni oljalady. Eki retinde de ol olımpıadalyq rekord ornatty. Buǵan deıin jer-jahandaǵy eshbir júzýshi ondaı kórsetkishke qol jetkize almaǵan edi. Tipten dańqy jer jarǵan Maıkl Felpstiń ózine ondaı baq buıyrmaǵan. 22 jastaǵy Týlýzanyń týmasy 200 jáne 400 metrge keshendi júzýde de aldyna jan salmaı, 4h100 estafetasynda qola medaldy ıelendi.

Fransııanyń bas shaharynda 57 kg salmaqta judyryqtasqan Munarbek Seıitbekuly jeńis tuǵyryna kóterildi. Bul – Qyrǵyzstannyń boks tarıhyndaǵy Olımpıadanyń tuńǵysh júldesi. Qazirgi kezde áleýmettik jelide rıngtiń buryshyndaǵy Munarbekke ulttyq quramanyń bas bapkeri Danııar Tologonulymen birge ózbek mamany Aqmal Hasanovtyń da sekýndant retinde járdemdesip júrgenin baıqaýǵa bolady. Sebebi Qyrǵyzstannyń Ulttyq Olımpıada komıteti boksshynyń jeke jattyqtyrýshysy Bekanas Sultanbaevqa akkredıtasııa bermeı, ony elde qaldyryp ketti. Jalǵyz óziniń qınalyp júrgenin baıqaǵan О́zbekstannyń ókili áriptesine kómekke keldi. Bul kórinis jýrnalısterdiń nazarynan tys qalǵan joq. Baýyrlas túrki halqynyń aýyzbirligi men bir-birine degen shynaıy janashyrlyǵyna tánti bolǵan BAQ ókilderi arnaıy rolık túsirip, sony jer-jahanǵa ǵalamtor arqyly taratyp jatyr.