Foto: Salı Sabırov, Vladıslav Semenov
El qorjynyna jalǵyz altyn júldeni dzıýdodan 60 kg deıingi salmaqta baq synaǵan Eldos Smetov saldy. 2016 jyly Rıo Olımpıadasynda – kúmis, 2021 jyly Tokıoda qola alǵan otandasymyz Parıjde Olımp shyńyn baǵyndyrdy. Osylaısha, jerlesimiz dzıýdodan Olımpıada chempıony atanǵan tuńǵysh qazaq sportshysy atandy.
Gımnast Narıman Qurbanov, palýan Demeý Jadyraev (77 kg) jáne boksshy Nurbek Oralbaı (80 kg) Olımpıadanyń kúmis medalin taǵyndy. Grek-rım kúresiniń palýany Demeý Jadyraev Olımpııa oıyndary tarıhynda araǵa 20 jyl salyp osy sport túrinen fınalda beldesti. Al Narıman Qazaqstan gımnastıka tarıhynda Olımpıadada medal alǵan tuńǵysh sportshy ataǵyna ıe boldy. Nurbek Oralbaı bokstan Olımpıada tarıhyndaǵy 26-shy júldeni qanjyǵalady.
Al Islam Sátpaev pen Aleksandr Le (nysana kózdeýden aralas juptyq syn), dzıýdoshy Ǵusman Qyrǵyzbaev (66 kg) jáne boksshy Nazym Qyzaıbaı (50 kg) Parıj Olımpıadasynyń qola júldegeri atandy.
«Sportshylarymyzdyń budan da táýir nátıjege qol jetkizýge múmkindigi boldy. Degenmen, Tokıo Olımpıadasyndaǵy nátıjeden sabaq alyp, Parıjde jetistigimizdi jaqsarta aldyq. Tórt jyldan keıin AQSh-ta ótetin kelesi Olımpıadada budan da joǵary nátıjege qol jetkizemiz degen senimdemin», dedi Týrızm jáne sport mınıstri Ermek Marjyqpaev.
Aıta keteıik, Parıj Olımpıadasynda Qazaqstan quramasynyń 78 atleti 25 sport túrinen synǵa tústi. Sonyń ishinde 54-i alǵash ret Olımpıadaǵa qatysty. Parıjdegi dúbirli dodada jalpy 91 eldiń sportshysy júldegerler qatarynan kórindi. Kelesi jazǵy Olımpııa oıyndary 2028 jyly AQSh-tyń Los-Andjeles qalasynda ótedi.
