Foto: Jetisý oblysynyń baspasóz qyzmeti
Fransııadan elge oralǵan bette týǵan jerine arnaıy atbasyn tiregen balýan Jarkent qalasynyń ortalyq alańynda halyqtyń ystyq yqylasyna bólendi. Kezdesýge myńnan astam halyq jınaldy. Sportshyny qarsy alýǵa Jetisý oblysy ákiminiń orynbasary Dıas Esdáýletov, aýdan ákimi Marat Saǵymbek, 2008 jylǵy Beıjiń Olımpıadasynyń kúmis júldegeri, balýan Nurbaqyt Teńizbaev, ardagerler, jastar, jalpy aýdan turǵyndary keldi.
Júzdesýde Sosıalıstik Eńbek Eri Kúlásh Aıtjanova, aýdandyq ardagerler uıymynyń tóraǵasy Toqtarbaı Kerimqulov, sportshy Nurbaqyt Teńizbaev chempıondy Parıj Olımpıadasyndaǵy aıtýly jeńisimen quttyqtap, izgi tilekterin jetkizdi.
Turǵyndardyń yqylasyna bólengen Demeý Jadyraev Parıj tórindegi beldesý kezinde jankúıerlerdiń, sonyń ishinde týǵan eliniń aq tileýi ózine kúsh bergenin aıtyp, qushaq ashyp qarsy alǵan jerlesterine alǵys aıtty.
«Halyqqa, aýdan turǵyndaryna rızashylyǵymdy bildiremin. Men kópshiliktiń qoldaýyn únemi sezinip kelemin, sondyqtan ár qadamyma jaýapkershilikpen qaraımyn. Budan bylaı da sporttaǵy jolymdy jalǵastyryp, halyqtyń úmitin aqtaımyn dep sendiremin», dedi D. Jadyraev.
Osy kezdesýde Demeýge avtokóliktiń kilti syıǵa tartyldy. Olımpıadanyń kúmis júldegeriniń alǵashqy bapkeri Jumahan Turǵambekov pen jeke bapkeri Boranbek Qońyratovqa da avtokólik kilti tabystaldy.
Atap ótsek, Qazaqstan Respýblıkasynyń eńbek sińirgen sport sheberi Demeý Jadyraev 2003-2007 jyldary Taldyqorǵan qalasyndaǵy daryndy balalarǵa arnalǵan sport-ınternatynda oqyǵan.
Buǵan deıin ol Halyqaralyq týrnırler men Álem chempıonattarynyń birneshe márte júldegeri bolǵan. Sportpen aınalysyp júrgenine - 20 jyl.
