Kitaphanadaǵy hakim toıy

Oraıly tusta oıǵa túsireıik. Prezıdent Qasym-Jomart Toqaev aqynnyń 175 jyldyq mereı­toıynda sóılegen sózin­de Abaıdyń tulǵalyq jáne qoǵam­dyq damý úderisiniń qozǵaýshy kúshi ekenin jetkizgen edi. «Abaı – memleket isiniń múddelesi, birligi jarasqan jurt bolý ıdeıa­synyń jaqtaýshysy. Ol óz shy­ǵarmalary arqyly el eńsesin tikteýge zor úles qosty. Uly aqyn ultty uıystyryp, ádiletti qoǵam qurýǵa úndeıdi», dep oıshyldyń asyl murasyn ardaqtaý, ony san qyrynan dáripteý – barsha­myz­dyń mindetimiz ekenin, onyń ár sózine jete mán berip, astaryna úńilip, parasat-paıymyna boılaı bilý qajettigin aıtqan bolatyn.

Soǵan oraı Ulttyq akade­mııa­lyq kitaphana da hakimniń bolmysy men shyǵarmashylyǵyna qatysty keshendi is-sharalardy júzege asyrdy. Sonyń biri – «Abaı – tutas bir álem» taqyrybyndaǵy kitap kórmesi. Onda abaıtaný salasyndaǵy úzdik zertteý jumystary men aqyn týraly jazylǵan kórkem shyǵarmalar el nazaryna usy­nyldy. Kórme Qazaqstannyń eńbek sińirgen qaıratkeri, ánshi Qalqataı Qumarbektiń oryn­daýyn­daǵy Abaıdyń áni «Segiz aıaq­pen» bastalyp, belgili ólketanýshy, qalamger Qalıbek Altybaevtyń «Abaı álemine saıahat» kitabynyń tanys­tyrylymymen jalǵasty. «Bul – hakimniń júregine tereń boılaý úshin ár oqýshy men muǵalimniń qolynda bolýy tıis keńesshi kitap. Synyp saǵattaryn osy kitap suraqtarymen túıindep, oıyndyq tásil arqyly qorytyp otyrý aqyn iliminiń bala sanasyna sińýine oń yqpalyn tıgizedi», deıdi jazýshy Janat Elshibek.

Sonymen qatar akademık Sherýbaı Qurmanbaıulynyń moderatorlyǵymen ǵalym, fılologııa ǵylymdarynyń doktory, professor Shákir Ybyraevtyń «Abaıtanýdyń zamanaýı damýy jaıynda» taqyrybynda dárisi ótti.

Qazirgi tańda aqyn shyǵar­ma­lary shet tilderine keshendi túrde tárjimalanyp, álemniń be­deldi kitaphanalaryna jibe­rilip, ondaǵy elshilikterdiń janynan Abaı ortalyqtary ashylyp jatyr. Soǵan oraı, kitaphanada «Abaı óleńderi álem tilderinde» atty is-sharasy bolyp ótti. Onda aqynnyń «Ǵylym tappaı maqtanba» óleńi álemniń toǵyz tilinde oqyldy.

Aqynnyń shyǵarmashylyq álemindegi negizgi maqsuty – adam tárbıesi. Osy turǵydan alǵanda ult ustazy retinde Abaıdyń aǵartýshylyq qyzmetin basa aıtqan jón. Aqyn óziniń ǵaq­lııa­larynda bilim-ǵylym isine qadam basý úshin talap keregin, onyń sharttary baryn eske salady. Oqý-ónerge qushtarlyq arman-ańsarmen shektelmeıdi. Ony tanyp-bilip, kóńilge túıgenniń máni aıryqsha. Ásirese ómirlik ustanymnyń qalyptasar tusynda jas balanyń tárbıesine jiti kóńil bólý kerektigin aıtady. Bul turǵyda Abaıdyń eresekterge ǵana emes, jas urpaqqa da túsinikti bolýy mańyzdy. Osy maqsatta Nazarbaev ýnı­ver­sıtetiniń professory Gúltas Qurmanbaı kitaphananyń kish­kentaı oqyrmandarymen «Bala Abaı» atty storıtellıng janrynda ashyq suhbat ótkizdi.