«Dala qasqyry» – trıller men drama elementteri astasqan týyndy. Shyǵarmashylyq top ssenarııge alty jyl buryn kirisip, túsirilim jumystary 2021 jyly bastalǵan.
Fılm túsirilimi elimizde, atap aıtqanda, Almaty jáne Jetisý oblystarynyń aýmaǵynda ótken. Oǵan 100-den astam maman jumylǵan. Qaýipti trıýkterdi elimizdiń kaskaderleri oryndady, buǵan qosa Belorýssııadan arnaıy mamandar da shaqyrylǵan. Fılmde joǵalǵan ulyn izdegen Tamara esimdi áıeldiń oqıǵasy baıandalady. Ol kómekke júginip, detektıv jaldaıdy jáne bul sheshimi kútpegen saldarǵa ákeledi.
«Dala qasqyry» – zorlyq-zombylyq, kek qanshalyqty ózin aqtaıtyny, kúshti áıel týraly fılm. Keıipker bir qaraǵanda álsiz kórinedi, biraq is júzinde onyń minezi men rýhy myqty. Fılm halyqaralyq aýdıtorııanyń nazaryn aýdardy. Halyqaralyq festıvalde júldeli oryndarǵa ıe bolyp, tabysqa jetip jatyr», deıdi fılmniń prodıýseri Álııa Meńdiǵojına.
«Dala qasqyry» jaqynda Kanadadaǵy «Fantasia Film Festival» festıvalinde top jardy. Dúbirli dodada fılm akterleri Berik Aıtjanov pen Anna Starchenko «Úzdik akter» atanǵan edi. Sonymen qatar fılm operatory Erkinbek Ptyralıev Oskar akademııasynyń múshesi boldy.
«Dala qasqyry» – janrlyq kıno. Balasyn janushyra izdegen ananyń eshnárseden taısalmaı, kedergilerge qaramaı, tipti qaýippen betpe-bet kele alǵa umtylatynyn baıandaıdy. Týyndynyń basqa sıýjettik jelisi joq, ol oryn alǵan oqıǵanyń aınalasyn ǵana aıshyqtap, kórermenge tap-tuınaqtaı etip jetkizedi», deıdi rejısser Ádilhan Erjanov.
Eske salsaq, atalǵan týyndy ótken jyly Rotterdam kınofestıvalinde joǵary baǵalandy. Sondaı-aq Belgııada ótken halyqaralyq kınofestıvalde bas júlde ıelendi. ReimsPolar 2024 kınofestıvalinde de marapattalǵan bolatyn.
