Venchýrlyq Ádep kodeksi

Munda ádeptilik, adaldyq, jaýap­ker­shilik, senim, toleranttylyq, parasatty básekelestik, startaptar qyzmetine ın­vestorlardyń aralaspaýy, startap múd­delerin qorǵaý, zańdylyq, sybaılas jemqorlyqqa tózbeýshilik jáne qo­ǵam­dyq tarap basymdyǵy sııaqty qaǵı­dattar baıandalǵan.

– Venchýrlyq kodeksti qurý ıdeıasy oıymyzda áýelden boldy. Amerıka naryǵynda startaptardyń ınvestorlar men jurtshylyqty adastyrǵan jaǵdaılar oryn alǵan edi. Osylaısha, búkil venchýrlyq naryqtyń bedeline nuqsan keldi. Elimizde mundaı jaǵ­daı­dyń aldyn alý maqsatynda osy kodeksti qurýdy uıǵardyq. Ol – erikti, tártip sanksııalary jáne zańdy kúshi joq. Biraq mundaǵy adaldyq, ádeptilik, ashyqtyq jáne toleranttylyq normalaryn saqtaýǵa qol qoıyp, jarııa mindetteme alý aıtarlyqtaı serpin beredi, – dedi Activat VC bas dırektory Marat Tólibaev.

Atalǵan Ádep kodeksine ındýs­trııa ókilderi saltanatty túrde qol qoıdy. Olardyń qatarynda: «Astana Hub», «BGlobal VC», «MOST Ventures», «MyVentures», «Tumar Venture Fund», «Activat VC», «BigSky Capital», «BYB Capital», «InDrive NewVentures», sondaı-aq «EasyTap», «ApartX», «Garderob», «Porte», «Smartestprep», «GoDays», «Billz» startaptary jáne basqalary bar.

– Kodeks elimizde etıkalyq jáne ashyq venchýr naryǵyn qurý jolyndaǵy mańyzdy qadam bolmaq. Osy normalardy saqtap, IT-kásipkerlikti damytý jáne jańa ınvestısııalar tartý úshin qolaıly jaǵdaılar jasaı alamyz. Naryqtyń barlyq qatysýshysy kodekske qol qoıyp, onyń qaǵıdattaryn ustanady dep úmittenemiz, – dedi «Astana Hub» basqarýshy dırektory Tańat О́skembaev.

Qol qoıýshylar pikirinshe, Ádep kodek­siniń normalaryn ustaný Qazaq­stan venchýrlyq naryǵynda ózara senim, izgi nıet pen yntymaqtastyqty qalyp­tas­tyrýǵa yqpal etedi. Osylaısha, ın­dýs­trııaǵa da, onyń jekelegen qatysý­shy­laryna da teris áser etýi múmkin jaǵdaılardyń aldyn alýǵa súbeli úles qosady.