Kezdesý barysynda kenish júrgizýshileriniń kásibı qyzmeti men áleýmettik kepildikterine qatysty máseleler talqylandy. Bıyldan bastap zııandy eńbek jaǵdaıynda jumys istep júrgen 55 jasqa tolǵan azamattarǵa memleket arnaýly áleýmettik tólem bere bastaǵany belgili. Basqosý barysynda júrgizýshiler ózderin osy tólem alý quqyǵyna ıe tulǵalar tizimine qosýdy surady.
Májilis vıse-spıkeri bul máseleni Eńbek jáne halyqty áleýmettik qorǵaý mınıstrligimen birlese otyryp talqylaý qajet ekenin aıtty. О́ıtkeni zııandy eńbek jaǵdaıyndaǵy jumysshylardyń tizimin osy mınıstrlik bekitedi. Májilis tóraǵasynyń orynbasary «SSKО́B» AQ jumysshylarǵa áleýmettik kepildikter berý jáne óndiristegi qaýipsizdikti qamtamasyz etý jóninen elimizdegi jetekshi kásiporyndardyń biri ekenin de atap ótti.
«Karerlik júk kólikterin júrgizý asa aýyr ári júıkege aıtarlyqtaı júk túsiretin jaýapty da beıneti mol jumys ekenin jaqsy bilemiz. Sizderge laıyqty eńbek jaǵdaıyn jasap, densaýlyqtaryńyzdyń qorǵalýyn qamtamasyz etýdiń de óte mańyzdy ekenin túsinemiz. «Amanat» partııasy saılaýaldy baǵdarlamasynda zııandy jáne qaýipti óndiristerde jumys isteıtin qyzmetkerlerdiń erte zeınetke shyǵýyn qamtamasyz etý mindetin qoıǵan bolatyn. Depýtattar zań ázirledi, Prezıdent qoldady. Búginde el kóleminde 8 myńnan astam adam tólem alyp jatyr. Al kenishtegi júk túsiretin kólik júrgizýshileriniń zeınetke erte shyǵý quqyǵyna ıe bolýy jónindegi máseleni Úkimetpen birlese otyryp qarastyramyz», dedi Albert Raý.
Zııandy óndiristerde jumys isteıtin qyzmetkerlerdiń zeınet jasyn 55 jasqa deıin tómendetý týraly zań bıyl 1 qańtardan bastap kúshine engenin aıta ketken jón. Zań qaýipti eńbek jaǵdaıynda jumys istep kelgen azamatqa zeınetke shyǵý nemese qyzmet túrin ózgertip, jeńil jumysqa aýysý múmkindigin beredi. Zeınet demalysyna erte shyǵý úshin nemese tıisti tólemderdi resimdeý úshin jumysshynyń keminde 7 jyl eńbek ótili jáne mindetti zeınetaqy jarnasy bolýy qajet.
Jıynnan soń Albert Raý Sokolov-Sarybaı ken-baıytý óndiristik birlestigindegi avtomobıl sehynyń jumysymen tanysyp, kásiporynnyń partııalyq belsendilerimen júzdesti.
Qostanaı oblysy
