Foto: FK «Qaırat»
Is-shara «Qaırat» FK men kommersııalyq emes Supernovas by inDrive jobasynyń yntymaqtastyǵy aıasynda ótti. Bul joba shaǵyn qalalar men aýyldarda balalar sportyn jappaı damytýǵa baǵyttalǵan. 2022 jyly iske qosylǵan joba qazirdiń ózinde 650-den asa bala qatysatyn 9 fýtbol seksııasyn ashty. Jıynnyń negizgi maqsaty – balalarǵa turatyn jerine qaramastan teń múmkindik berý.
«Supernovas jobasy aýyl men qala balalarynyń teńdeı jaǵdaı jasaýyna, birdeı jattyǵý múmkindigine ıe bolýǵa arnalǵan. Olardy bul jıynǵa qatystyra otyryp, ózin kórsetýge, áleýetin ashýǵa múmkindik bergimiz keledi», dep túsindirdi jobanyń menedjeri Toqtar Eskendirov.
Bıylǵy irikteý jıynyna elimizdiń aımaqtarynan 16 bala tańdalǵanyn «Qaırattyń» bas dırektory Asqar Esimov bylaı jetkizdi: «Qaırat» dástúrli túrde elimizdiń túkpir-túkpirinen eń úzdik jas fýtbolshylardy jınap turady. Irikteýge qatysý – balalardy yntalandyrady ári zor tájirıbe. Biz Supernovas jobasymen seriktes bolǵanymyzǵa qýanyshtymyz jáne seriktestigimiz ary qaraı da jalǵasatynyna úmittimiz. Fýtbol akademııamyz – qazirgi ýaqytta eldegi eń myqty akademııa jáne el fýtbolyn úlken arenada áıgili etetin talanttardy izdeıdi».
Qatysýshylar Batys Qazaqstan, Aqtóbe, Ulytaý, Mańǵystaý, Soltústik Qazaqstan, Túrkistan oblystarynyń shalǵaı aýyldarynan irikteldi. Mysaly, Batys Qazaqstan oblysynyń Jánibek aýylynan Esimjan Esimǵalı, Madııar Esenov, Beıbarys Asqar, Álıhan Tuıaq, Nurmuhammed Eset, Enel Sansyzbaev kelse, Aqtóbe oblysy Shalqar qalasynan Aslan Rýslanuly, Erasyl Nurlanuly, Almat Altaev, Nurıman Muhanbetjan «Qaırattyń» bazasynda bir apta boıy óner kórsetý múmkindigine ıe boldy. Sondaı-aq Ulytaý oblysy Ulytaý aýylynan – Aslan Saqtaǵan, Beksultan Jezdibek, Fort-Shevchenko qalasynan (Mańǵystaý oblysy) – Janseıit Jumabek, Dıas Jaılaý, Blagoveshenka aýylynan (SQO) – Nurıslam Esmaǵambetov, Túrkistan oblysy Yntymaq aýylynan Álınur Abaıuly kásibı fýtbol bazasynda alǵash ret boldy.
Is-shara bir aptaǵa sozyldy. Baǵdarlamada akademııa jattyqtyrýshylary ótkizetin jattyǵýlar, sheberlik sabaqtary, 2012 jylǵy «Qaırat» akademııasynyń komandasymen joldastyq match ótkizdi.
