Foto: Halyq Uni
«Aýdandyq ortalyq aýrýhanada esepte turǵandyqtan, tegin dári-dárimek alatyn naýqastardyń sany negizsiz qysqartylǵan. Dárilik zattar ýaqtyly jetkizilmegen. Jylyoı aýdandyq prokýratýrasynyń qadaǵalaý aktisi boıynsha aýdandyq ortalyq aýrýhanada qant dıabeti, arterıaldyq gıpertenzııa dıagnozdarymen esepte turǵan 4 myń 54 adamǵa 19 mln 155 myń 349 teńgeniń 4 866 qaptama kóleminde dári-dármekteri berildi. Onyń ishinde «Djardıns», «Invokana», «Trajenta», «Forsıga» taǵy basqa dáriler bar. Osylaısha, aýdandyq prokýratýra turǵyndardyń konstıtýsııalyq quqyqtaryn qalpyna keltirdi», dep habarlady oblystyq prokýratýradan.
El azamattarynyń konstıtýsııalyq quqyǵynyń, túrli zańdylyqtyń saqtalýyn qadaǵalaıtyn prokýratýranyń qyzmetkerleri aqjeleńdiler tarapynan taǵy bir zańsyzdyqty áshkereledi. Bul joly Maqat aýdandyq aýrýhanasynyń dárigerleri 13 óndiristik jaraqat deregin jasyryp qalǵany anyqtalyp otyr.
«Medısınalyq mekemeniń qyzmetkerleri 13 óndiristik jaraqat faktisin jasyrǵan. Atalǵan faktiler boıynsha jumys berýshiniń kinásiniń dárejesin anyqtaý úshin mindetti tekserý-tergeý qamtamasyz etilmegen. Saldarynan jábirlenýshiler ózderine tıesili ótemaqy alý quqyǵynan aıyryldy. Prokýrorlyq qadaǵalaý aktisi negizinde aýdandyq aýrýhana Ákimshilik quqyq buzýshylyq týraly kodeksiniń 96-babynyń 1-bóligimen (Eńbek qyzmetine baılanysty jazataıym oqıǵa faktisi týraly habarlamaý) ákimshilik jaýapkershilikke tartyldy», dep málimdedi oblystyq prokýratýradan.
Al aýdandaǵy Beıbarys aýyldyq okrýginiń ákimi memleketke qomaqty shyǵyn keltiretin zańsyz áreketke barǵan. Ol «Pervomaıskıı» JShS-ǵa pontonǵa ornatylǵan sý nasosy stansasyn tender ótkizbeı, senimgerlikke berip jibergen.
«Mahambet aýdandyq prokýratýrasynyń taldaýy sharýashylyq sýbektisi pontondyq stansany memleketke zııandy túrde qoldanýdy jalǵastyryp kelgenin anyqtady. Osyǵan baılanysty aýdan ákimine zań buzýshylyqty joıý týraly usynys berildi. Quny 38 mıllıon teńgeni quraıtyn nasos stansasy memleket ıeligine qaıtarylyp, aýyldyq okrýg ákimi men esepshisi tártiptik jaýapkershilikke tartyldy», dep habarlady oblystyq prokýratýradan.
Árıne, zańsyz áreket erte me, kesh pe, áıteýir, áshkere bolatyny daýsyz. Eldiń múddesine nuqsan keltirip, turǵyndardyń konstıtýsııalyq quqyǵyn buzǵandar ákimshilik, ne ózge jaýapkershilikke tartylyp jatyr. Alaıda ádiletti qoǵam qurýǵa qadam basqan sátte zańsyz áreketke baratyndar azaımaı otyr. Ár deńgeıdegi basshylar qoǵammen birge jańarýǵa, quqyqtyq saýatyn jetildirýge talpynbasa, ádiletti Qazaqstannyń órkendeýine qalaı úles qosady?
Atyraý oblysy
