Qanjyǵada – qos kúmis

Jarysty grek-rım kúresi sheberleri bastady. Alǵashqy kúni eki balýanymyzdyń qan­jyǵasy maılandy. 55 kg salmaq­taǵy Alpamys Bolatuly qarsy kelgenderin qoǵadaı japyryp, aqtyq synǵa alqynbaı jetti. Alaıda bas júlde úshin básekede qandasymyzdyń joly bolmady. AQSh-tyń ókili Djeıden Ren­nıden nebári eki upaı aıyr­mashy­lyǵymen (5:7) jeńilgen Alpamys kúmis medaldy qanaǵat tutty.

80 kg salmaqta synǵa túsken Er­kebulan Ánapııa da dál sondaı nátıje kósetti. Bastapqy báse­kelerde ýkraınalyq Vladıslav Solodchýk (11:0) pen moldovalyq Nı­kıta Apostoldy (8:0) oısyrata utqan qazaq óreni jartylaı fınal­da ázerbaıjandyq Orhan Gad­jıevtiń jaýrynyn jerge tıgizdi. Biraq sheshýshi tusta Erkebulannyń bul jarysqa beıtarap sportshy retinde qatysqan reseılik Mıhaıl Shkarınge (0:3) áli jetpedi.

Edige Tóleýtaı (48 kg) jartylaı fınalda ırandyq Armın Sham­sıpýrhajı jáne qola medal úshin tarysta ázerbaıjandyq Amrah Ama­novtan aılasyn asyra almady. Kelesi kúni beldesken Erasyl Musan (48 kg) úndistandyq Saınat Pardhıdenge jáne Damır Ábilda (45 kg) qyrǵyzstandyq Bekjan Beıshembaevqa jol berdi. Bul ba­lýandardyń barlyǵy da besinshi oryndy qanaǵat tutty. Sóıtip, ataq­ty balýan Almat Kebis­baev jat­tyq­tyratyn Qazaq­stannyń grek-rım kú­resi ókilderi Ammandaǵy jarys­ty qos kúmispen qorytyndylady.

Odan keıin áıelder kúresinen básekeler bastaldy. Bul jarys­ta Jasmına Baqoeva (40 kg), Ánel Búrkitbaeva (43 kg), Medına Qýanyshbek (46 kg), Farıda Ábdirahmanova (49 kg), Madhııa Ýsmanova (53 kg), Anna Stratan (57 kg), Jaıdar Muqat (61 kg), Uldana Tileýhan (65 kg), Qyzjibek Jarqynbaeva (69 kg) jáne Aqbota Qadyr (73 kg) syndy sulýlar óner kórsetip jatyr. Qazirgi kezde Anna men Uldananyń jartylaı fınalda súringeni belgili boldy. Endi olar qola medal úshin talasady.

Burymdylar óz básekelerin aıaqtaǵannan keıin erkin kúresten ótetin jarysty tamashalaımyz. Atalǵan dodada el quramasynyń aǵa jattyqtyrýshysy Dáýlet Nııazbekov myna shákirtterine senim artty: 45 kg – Bekzat Amangeldi, 48 kg – Damır Qalı, 51 kg – Ibrahım Ysqaqbek, 55 kg – Eraly Áskerbek, 60 kg – Bekasyl Asambek, 65 kg – Baqdáýlet Ákimjan, 71 kg – Ámir Orazbaev, 80 kg – Beıbarys Erǵalı, 92 kg – Raıym Máýletov jáne 110 kg – Edige Qasymbek.