Ekologııa problemalaryna – erekshe nazar

Memleket basshysy Nursultan Nazarbaevtyń tóra­ǵalyǵymen Qaýipsizdik Keńesiniń otyrysy ótti, dep habarlady Prezıdenttiń baspasóz qyzmeti. Otyrys barysynda eko­lo­gııa­lyq qaýip­sizdik máseleleri, qor­shaǵan ortany qorǵaý sa­lasyndaǵy qabyldanyp jatqan sharalar talqylandy. Nursultan Nazarbaev Aq­mo­la ob­lysyndaǵy Kalachı jáne Batys Qazaqstan obly­syn­daǵy Berezovka aýyldary tur­ǵyndarynyń den­saý­ly­ǵyn qorǵaýǵa qatysty má­se­lelerdi tez­detip retteý qajet­tigin aıtty. Osyǵan baılanys­ty halyqtyń ózderi turatyn óńir­­degi ekologııalyq ahýal tý­raly aq­paratqa erkin qoly jetýin qamta­masyz etýdiń mańyz­dylyǵy atap ótildi. – Kalachı aýylyndaǵy quby­lys­tyń sebebi neden ekenin áli eshkim durystap túsindirgen joq. Qu­zyrly organdar jaǵdaıdy anyq­taı almasa, qajetti sarap­shylary joq bolsa, onda she­tel­dikterdi shaqyryp, bul isti so­larǵa tapsyrýy kerek edi, – dedi Mem­leket basshysy. Qazaqstan Prezıdenti eko­lo­gııalyq qaterlerdi boljap, aldyn alýdyń tıimdi tetikterin jasaý tehnogendi jáne tabıǵı sıpattaǵy tótenshe jaǵdaılardan bolatyn shy­ǵyndy meılinshe azaıtýǵa múm­kindik beretinine nazar aýdardy. Memleket basshysy Úkimet pen jergilikti atqarýshy organ­dar Qazaqstandy ornyqty da­my­tý jónindegi mindetterdi oryndaýmen qatar, janýarlar men ósim­dik áleminiń bıoalýandyǵyn saq­taýdy qamtamasyz etýge, sonyń ishinde birqatar oblystardaǵy kıiktiń jappaı qyrylýynyń basty sebepterin anyqtaýǵa mindetti ekenin aıtty. – Árqıly boljamdar men qa­rama-qaıshy pikirler aıtylýda. Ol degenińiz, bul baǵytta múl­de jónsizdik oryn alyp otyr­ǵanyn, tıisti mamandardyń joq­tyǵyn, osyndaı jaǵdaıǵa ákelip soqtyrǵan jaıttardy anyqtaı almaǵandyqty bildiredi, –  dedi Elbasy. Nursultan Nazarbaev atap ót­kendeı, tabıǵat qorǵaý sala­syn­daǵy saıasat resýrs únemdeý, sharýashylyq qyzmetiniń barlyq salasynda qaldyqsyz tehnologııalardy engizý máselelerin sheshý isine bıznesti yntalandyryp, keńinen tartýǵa baǵyttalýy tıis. El halqynyń densaýlyǵy men joǵary sapaly, jaıly tur­mysyn qamtamasyz etý Qazaq­stan ǵylymynan qorshaǵan orta ahýa­lyna strategııalyq taldaý jasaýǵa jáne kez kelgen teris qu­bylystyń aldyn alýǵa múmkin­dik beretin serpindi zertteýler men ázirlemelerdi talap etedi. Memleket basshysy qorshaǵan ortanyń ahýalyn monıtorıngileý, ekologııa salasyndaǵy qaterlerdi aldyn ala anyqtaý úshin Jerdi qashyqtan zondtaıtyn, 2014 jy­ly iske qosylǵan qazaqstandyq eki ǵarysh apparatyn tıimdi paı­da­la­nýdyń mańyzdylyǵyna toq­taldy. Sonymen qatar, Elbasy ın­dýs­trııa­landyrý, agrarlyq sek­tor men shaǵyn jáne orta bız­nesti damytý mindetterimen birge, Qazaqstannyń ekologııalyq qaý­ip­sizdikti qamtamasyz etý máse­lelerine kóńil bólýi qajettigine nazar aýdardy. Jerdiń shóleıttenýi men tozýy, keıbir eldi mekenderdegi aýa sapasynyń nasharlyǵy, sý­dy tıimsiz paıdalaný, ónerkásip­ter­den zııan­dy zattardyń aýaǵa taraýy men qoqys tas­taıtyn oryn­dar­dyń retsiz ornalasýy, tur­mystyq qaldyqtardyń qordalanýy sııaq­ty qaterler memleket pen bıznes tarapynan naqty sharalar qabyl­daýdy qajet etedi. Energetıka mınıstri V.Shkol­nık óz baıandamasynda ekolo­gııa­lyq ahýalǵa, memlekettik or­gan­dardyń osy saladaǵy, sonyń ishinde Qazaqstannyń «jasyl eko­no­mıkaǵa» ótý jónindegi tujy­rym­damasy aıasyndaǵy qyzmetine sholý jasady. Talqylaý qorytyndysy boıynsha Qazaqstan Prezıdenti Úkimetke birqatar naqty tapsyrma berip, olardyń oryndalýyn baqylaýdy Qaýipsizdik Keńesiniń Hatshylyǵyna júktedi. Sýretterdi túsirgender S.BONDARENKO, B.OTARBAEV.