Al qazir 750-den astam mekteptiń basshylyǵy shahmatty oqý baǵdarlamasyna engizýge daıyn ekenin jetkizgen. Birden aıtaıyq, pán retinde emes. Qazir bilim júıesinde qoldanylyp júrgen varıatıvti komponent degen termın burynǵy fakýltatıvti sabaq degen uǵymdy bildiredi. Iаǵnı tańǵy aýysymda oqıtyn oqýshy tústen keıin mektepke baryp shahmat úıirmesine qatysa alady degen sóz.
Joba sheńberinde 1–4 synyptarǵa arnalǵan «Shahmat negizderi» oqý baǵdarlamasy ázirlenip, bekitilgen. Oqý baǵdarlamasy sheńberinde shahmatty bastaýysh synyp pedagogteri úıretedi. Bul týraly Astanada ótken «Bilim berýdegi shahmat» halyqaralyq konferensııasy barysynda aıtyldy.
Atalǵan is-sharany Oqý-aǵartý mınıstrligi, Halyqaralyq shahmat federasııasy (FIDE), «Freedom Holding Corp» bas áriptestigimen KazChess/Qazaqstan shahmat federasııasy uıymdastyrdy. Konferensııada AQSh, Eýropa, Azııa jáne TMD elderiniń halyqaralyq sarapshylary, sondaı-aq elimizdiń bilim júıesinde eńbektenip júrgen 200-den astam pedagog bas qosty. Eki kúndik paneldik pikirtalas barysynda halyqaralyq jáne otandyq sarapshylar sıfrlandyrý jáne jasandy ıntellekt qarqynymen damyp jatqan zııatkerlik oıynnyń adam daǵdysynyń damýyna tıgizetin áserin talqylady.
«Búginde Qazaqstan shahmat federasııasy osy zııatkerlik oıyndy bilim salasyna engizý úderisiniń negizi bolyp otyr. Oqý-aǵartý mınıstrligimen jáne jergilikti atqarýshy organdarmen birlesip, byltyr qanatqaqty joba retinde elimizdiń jeti óńirindegi 42 mekteptiń 1000-ǵa jýyq oqýshysy shahmatty meńgerdi. Sonymen qatar 1-synyp oqýshylaryna arnap ázirlengen oqý-ádistemelik keshen maquldandy», dedi KazChess birinshi vıse-prezıdenti Dármen Sádýaqasov.
Aıta keteıik, bıyl sáýir aıynda 1-synyp oqýshylaryna arnap ázirlengen oqý-ádistemelik keshen bekitilgen. Qazirgi ýaqytta ekinshi synyp oqýshylaryna arnalǵan oqý-ádistemelik keshen ázirlendi, ony da bekitetin kún alys emes. 2024–2025 oqý jylyna daıyndyq maqsatynda aımaqtardyń bilim basqarmalarymen birlese otyryp shahmatty varıatıvti pán retinde engizýge daıyn ekenin rastaǵan 767 mekteptiń tizimi anyqtalǵan. Qazirgi ýaqytta mektepterdiń tizimi jergilikti bıýdjettiń múmkindikteri men bir adamǵa shaqqandaǵy qarjylandyrý kólemi eskerilip, bilim basqarmalary deńgeıinde naqtylanyp jatyr.
