Bul konferensııa 1956 jyldan bastap dúnıe júziniń ár elinde tórt jylda bir ret ótedi. Sondyqtan aıtýly jıyn bıyl elimizde ǵana emes, Ortalyq Azııa kóleminde alǵash ótip otyr. Oǵan AQSh, Reseı, Japonııa, Qytaı, Brazılııa, Túrkııa, Ońtústik Afrıka, Chehııa, Ulybrıtanııa, Kanada, Portýgalııa, taǵy basqa elderden kelgen bedeldi ǵalymdar qatysyp, olar bir apta boıy ızolıatorlar men metall emes materıaldardaǵy aqaýlarǵa qatysty pikir almasyp, irgeli jáne qoldanbaly zertteýler jóninde dáris oqydy.
Mazmundy is-sharanyń ashylýynda sóz alǵan Eýrazııa ulttyq ýnıversıtetiniń rektory Erlan Sydyqov ǵalymdar arasyndaǵy yntymaqtastyqtyń bir kórinisi – halyqaralyq ǵylymı konferensııalar ótkizý ekenin atap ótti.
«Bizdiń fızık ǵalymdarymyz osydan bes jyl buryn, ıaǵnı 2019 jyly 20 eldiń ǵalymdary qatysqan REI-20 mereıtoılyq konferensııasyn ótkizgen edi. Búgin biz sondaı mańyzdy ǵylymı forýmnyń biri – 1956 jyly AQSh-tyń Argonna qalasynda bastalǵan konferensııalar serııasynyń HHI konferensııasyn ótkizip otyrmyz. Jańa ǵasyr bastalǵannan beri ICDIM konferensııalary – Ońtústik Afrıka, Latvııa, Brazılııa, AQSh, Fransııada ótkeni belgili. Al uıymdastyrý komıtetiniń sheshimimen 2024 jyly konferensııany Qazaqstanda, onyń ishinde L.N.Gýmılev atyndaǵy Eýrazııa ulttyq ýnıversıtetinde ótkizý uıǵaryldy. Endi tórt jyldan keıin, ıaǵnı 2028 jyly taǵy osyndaı halyqaralyq konferensııa ótkizý josparlanyp otyr», dedi rektor.
Konferensııa jumysyna Eýrzııa ulttyq ýnıversıtetiniń professory Alma Dáýletbekova men ǵylym doktory, Latvııa ýnıversıtetiniń qatty dene fızıkasy ınstıtýtynyń professory Anatolıı Popov tóraǵalyq etti. «Qazaqstanda alǵash ret ótip otyrǵan konferensııaǵa jas ǵalymdardyń qatysýy meni qýantty. О́ıtkeni qazirgi jastar óte bilimdi, belsendi. Olardyń arasynda halyqaralyq deńgeıde tanymal jas ǵalymdar da bar. Bul basqosý olarǵa sheteldik áriptesterinen jańa bilim alýǵa ǵana emes, sonymen qatar bolashaqta taǵylymdamadan ótýge, Eýropalyq ǵalymdarmen birlesip jańa zertteý jumystary týraly kelissóz júrgizýge múmkindik beredi», dedi Latvııa ýnıversıtetiniń professory A.Popov.
