Abaı oblysynyń kásipkerler palatasynyń uıymdastyrýymen aımaqtaǵy bıznes-qaýymdastyq ókilderiniń basyn qosyp otyrǵan bul sharaǵa qatysýshylardyń ónimin ádil qazylar alqasy baǵalap, sheshim shyǵarady. Qazylar tarapynan jáne joǵary suranysqa ıe bolǵan taýar óndirýshiler aldaǵy ýaqytta memleketten grant alyp, óz kásibin kórkeıtýge jol ashady.
«Bir aýyl – bir ónim» kórme-jármeńkesi bıyl ekinshi ret ótip jatyr. Atalǵan sharanyń aıasyn keńeıtý arqyly aýyl turǵyndarynyń kásipkerlik áleýetin arttyrý, qarapaıym azamattardyń ál-aýqaty men ómir súrý deńgeıin jaqsartý maqsatynda jańa kásipkerler men kásiporyndardyń sanyn arttyrýǵa múmkindik týady. Osy kórmege kelgen jáne qazylar alqasynyń sheshimimen úzdik dep tanylǵan jeke kásipkerler bolashaqta óz ónimderin eksporttaýǵa, naryqta óz ornyn tabýǵa bizdiń tarapymyzdan qoldaý kóredi. Bul joba isin jańadan bastaǵan kásipkerlerdiń ósýine tramplın retinde qyzmet etedi. Qatysýshylardyń arasynda shaǵyn bıznes sýbektileri de, jeke tulǵalar da bar», dedi saltanatty sharanyń ashylý rásiminde sóz alǵan Abaı oblysy kásipkerler palatasynyń dırektory Maqsat Ánýarbekuly.
Kórme qorytyndysy boıynsha 10 kásipker jartylaı fınalǵa shyǵady. Olardyń bıznes jobalary óńirlik brend komıtetiniń otyrysynda qaralyp, nátıjesinde úzdik úsh joba respýblıkalyq jáne halyqaralyq kórmelerde baq synap, bes mıllıon teńgege deıin memlekettik grant alý múmkindigine ıe bolady. Buǵan qosa úzdik dep tanylǵan joba ıegerleri Abaı oblysynyń kásipkerler palatasynyń qoldaýymen marketıng salasynan habar alyp, elektrondy kommersııa boıynsha trenıngter men ónimdi jaqsartý, taýar paıdalanýshylaryn tartatyn tartymdy logotıp ázirleý, qaptama jasaý boıynsha ádis-tásilderdi ıgerip shyǵady.
Memleketik granttan úmitti jandardyń biri «Kerim» ataýymen tirkelgen jeke kásipker Maqsat Kósherbaev osy kórmege Aqsýat aýdanynan arnaıy kelipti. Aýyl sharýashylyǵy qaldyqtarynan otyn daıyndaıtyn onyń ónimi kórme qonaqtarynyń qyzyǵýshylyǵyn týdyrdy. Kásipker sózinshe aldaǵy kúnde kómirdi almastyratyn bul otyndy daıyndaý úshin arnaıy avtomattandyrylǵan qalyptar kerek eken. Eger memlekettik qoldaý bolsa, jumysshy tartyp, paıdaly otynnyń ónimdiligin arttyrǵysy keletinin aıtty.
«Bala kúnimnen beri temir ustasy retinde qyzmet ettim. Sondyqtan maldyń tezegi men qora-jaıdyń aınalasyndaǵy qaldyqtardy iske jaratý úshin arnaıy qalyp oılap tabý qıynǵa soqqan joq. Bul oı maǵan qoqys polıgondaryna tastalatyn jáne aýyl-aımaqta órtelip jatatyn qoqystardy kórgennen keıin kelgen edi. Bastapqy kezderi shóp-shalam qaldyqtarynan osyndaı otyn jasaý keregin túsinip iske kirisip kettim. Bizde qazir «Taza Qazaqstan» ekologııalyq aksııasy júrip jatyr, qoqys polıgonyndaǵy zattardy osylaı paıdaǵa jaratýdy oılasaq, onda kún saıyn qymbattap jatqan kómirdi almastyratyn osyndaı otyn kerek-aq», deıdi aýyldaǵy aýlasynan bastalǵan kásibin kópshilikke tanystyrǵan jeke kásipker Maqsat Kósherbaev.
Sonymen birge ulttyq taǵam dástúrin jalǵastyrýshy retinde óz ónimderin usynǵan Jarma aýdanynyń turǵyny Aıgúl Erǵalıqyzy osy kórme-jármeńkege shujyq ónimderin ákelgen. Az ǵana ýaqyttyń ishinde ózderi turatyn Qalbataý aýyly jurtshylyǵynyń suranysyn týdyrǵan ónimderdi aldaǵy ýaqytta seh ashyp, kásibin ulǵaıtýdy maqsat tutypty. Osy sekildi et ónimderimen aınalysatyn Semeı qalasynyń turǵyny Merýert Nurjanqyzy da ejelgi dástúr boıynsha etti ystap, shujyqtyń ár túrin shyǵaryp keledi. Búginde qolastynda úsh jumysshy bar isker áıel keleshekte úlken kásiporyn bolyp qurylýdy qalaıdy. Aýyl kásipkerleri men ónimderiniń kórme-jármekesin uıymdastyrýshylar aldaǵy ýaqytta atalǵan kishi bıznes ókilderiniń órken jaıaryna senimdi.
Abaı oblysy
