Foto: Densaýlyq saqtaý mınıstrligi
Dıana Borodıno aýylynan Altaıdaǵy aýdanaralyq aýrýhanaǵa jedel járdem kóligimen jetkizilip, birden reanımatologtar, travmotologtar jáne gınekologtardyń qamqorlyǵyna alyndy. Naýqastyń basyn, moınyn, keýdesin, aıaq-qoldaryn birinshi, ekinshi jáne úshinshi dárejedegi kúıik shalǵany anyqtaldy.
Dárigerler naýqastyń jaǵdaıyn aýyr dep baǵalady. Oblystyq ortalyq mamandarynyń konsılıýmynan keıin tikushaq jibertýge sheshim qabyldandy. Aýdanǵa quramynda oblystyń bas reanımatology Galına Semenova, feldsher Nazym Beısenbaeva bar brıgada ushyp jetti. Zardap shekken áıel Shyǵys Qazaqstan oblystyq mamandandyrylǵan medısına ortalyǵyna jetkizildi.
«Bizdiń dárigerler – álemdegi eń úzdik mamandar. Olar qyzym ekeýmizdi aman alyp qalý úshin múmkin emesti jasady. Alda áli uzaq reabılıtasııa kútip tur, biraq eń qorqynyshtysy artta qaldy. Dárigerlerdiń arqasynda ómirimniń máni bar jáne sol úshin de emimdi jalǵastyramyn», dep qýanyshtyń kóz jasyn tóge otyryp jas ana alǵys aıtty.
Dıana men onyń balasynyń ómiri úshin óńirlik jáne respýblıkalyq dárigerlerdiń mýltıtártiptik brıgadasy kúresti. Bólimshedegi dáriger-reanımatolog-anestezıolog Aleksandr Nareıko men onyń áriptesteri naýqastyń ómirin saqtap qalý úshin bar kúshin saldy. Densaýlyq saqtaý mınıstrliginiń mamandary da medısınalyq kómek kórsetý úderisin úılestirip otyrdy.
Dıana ıntensıvti terapııaǵa shydap, erlik tanytty, terini aýystyryp salý boıynsha birneshe otadan ótti. Jarasyn OMMO travmotologııa bólimshesiniń meńgerýshisi Rafael Gafýrovtyń jeke ózi tańdy. Bala men ananyń jaǵdaıyn oblystyń shtattan tys bas gınekology Marat Kóksegenov turaqty qadaǵalap otyrdy.
Dıana — sońǵy eki aıda ShQO-da ómirin saqtap qalý múmkin bolǵan úshinshi ana.
Jaqynda dárigerler aýyr septıkalyq pnevmonııaǵa shaldyqqan, ókpesiniń 80 paıyzy zaqymdalǵan 18 jastaǵy naýqastyń ómirin alǵash ret EKMO ádisin qoldana otyryp aman saqtap qaldy. Qyzdyń jaǵdaıy jaqsaryp, ınfeksııalyq bólimshege aýystyryldy. Sonymen qatar aýyr ıntoksıkasııa jáne kóp aǵzalyq jetkiliksizdikpen túsken Samar aýdanynyń 44 jastaǵy turǵyny da qutqaryldy. 20 kún em alǵannan keıin onyń jaǵdaıy turaqtalyp, ol da terapııa bólimshesine aýystyryldy.
О́ńirge jumys sapary barysynda densaýlyq saqtaý mınıstri qıyn jaǵdaıdaǵy analar men balalar ómirin saqtap qalǵan batyr dárigerlerge salalyq marapattar tabystady.
Marapattalǵandardyń arasynda ITRAB meńgerýshisi, 20 jyldyq tájirıbesi bar joǵary sanatty dáriger-reanımatolog Gaýhar Mýrzaǵalıeva, 30 jyldyq tájirıbesi bar 1 sanatty dáriger-reanımatolog Elena Dmıtrıeva jáne 41 jyldyq jumys tájirıbesi bar joǵary sanatty dáriger-anestezıolog Aleksandr Nareıko bar.
ShQO-da ana óliminiń aldyn alý jaǵdaıynyń nátıjeleri boıynsha joǵary sanatty dáriger-kardıohırýrg, medısına ǵylymdarynyń kandıdaty, kardıohırýrgııa bólimshesiniń meńgerýshisi Edil Botabaev, Ana men bala ortalyǵyny dárigerleri – oblystyń bas akýsher-gınekology Marat Kóksegenov jáne akýsher-gınekolog Lıza Qasymhanova da marapatqa usynyldy.
